Prezident ZŠA Donald Tramp padpisaŭ zakon, jaki praduhledžvaje ŭviadzieńnie dadatkovych sankcyj suprać Rasii, paviedamili ŭ Biełym domie.
Abiedźvie pałaty amierykanskaha kanhresa raniej padtrymali zakonaprajekt, jaki taksama ŭklučaje miery suprać Irana i Paŭnočnaj Karei, piša VVS.
U ZŠA vykazvalisia zdahadki, što Tramp moža nakłaści vieta na zakonaprajekt, choć, z ulikam praktyčna adzinahałosnaj padtrymki zakona ŭ abiedźviuch pałatach parłamienta, vieta ličyłasia małaimaviernym.
Padpisaŭšy zakon, Tramp zajaviŭ, što jon utrymlivaje «antykanstytucyjnyja normy».
Hałoŭnaje ŭ novym zakonie — toje, što jon pazbaŭlaje prezidenta mahčymaści admianiać sankcyi suprać Rasii biez dazvołu kanhresa.
«Ja vystupaju za bolš žorstkija miery, za toje, kab pakarać i spynić ahresiŭnyja i destabilizujučyja pavodziny Irana, Paŭnočnaj Karei i Rasii, i ŭ toj ža čas liču, što hety zakon maje istotnyja niedachopy, — zajaviŭ Tramp. — Kanhres, śpiašajučysia pryniać hety zakon, uklučyŭ u jaho niekalki vidavočna antykanstytucyjnych pałažeńniaŭ».
Ciapier, kab admianić užo ŭviedzienyja sankcyi, prezident pavinien padać padrabiazna abhruntavany zapyt u profilnyja kamitety abiedźviuch pałat, jaki tyja razhledziać na praciahu 30 dzion i pahodziacca z prezidentam ci jamu admoviać.
Zakon zvodzić razam i dapaŭniaje vialiki abjom pryniatych raniej, paśla anieksii Kryma i pačatku vajny na Danbasie, dakumientaŭ ab sankcyjach suprać Rasii. Zakon nie ŭvodzić naŭprost nijakich novych mier i nie abaviazvaje prezidenta ich uvodzić.
U toj ža čas, pa mierkavańni šmatlikich ekśpiertaŭ, sama pahroza praduhledžanych u zakonie novych sankcyj moža prymusić niejkuju častku kampanij i finansavych ustanoŭ ZŠA i inšych krain z aściarožnaści ŭstrymacca ad pracy z Rasijaj.
Akramia pazbaŭleńnia prezidenta prava admianiać sankcyi, asnoŭnymi navinkami ŭ zakonie źjaŭlajucca sankcyi za ŭdzieł u budaŭnictvie i absłuhoŭvańni rasijskich trubapravodaŭ, za ŭdzieł u zamiežnych naftavych i hazavych prajektach, jakija trapili pad raniejšyja sankcyi rasijskich kampanij, sankcyi suprać datyčnych da kampjutarnych uzłomaŭ, dalejšaje ŭzmacnieńnie žorstkaści umoŭ kredytavańnia kampanij i bankaŭ, jakija raniej trapili pad sankcyi, a taksama publikacyja padrabiaznych dakładaŭ ab asobach, nabližanych da prezidenta RF Pucina.
Palitołah Alina Charysava pahadziłasia supracoŭničać z SBU. Akazałasia, heta było KDB36
Kamientary