Try sałdaty ź Piečaŭ znachodziacca ŭ RNPC u Navinkach. Adzin ź ich sprabavaŭ ździejśnić suicyd

Siarod pacyjentaŭ Respublikanskaha navukova-praktyčnaha centra psichičnaha zdaroŭja — sałdat, jaki zrabiŭ sprobu suicydu napiaredadni hibieli Alaksandra Koržyča ŭ Piečach.

— Moj syn ciapier sapraŭdy ŭ Navinkach, jaho pryvieźli tudy na minułym tydni, — raspaviadaje mama adnaho z sałdat vajskovaj čaści 39 864 navučalnaha centra ŭ Piečach. — Čamu jon tut? Ź dziaciej ździekujucca: patrabujuć hrošy, kraduć asabistyja rečy. A ja zarablaju vielmi mała, syn takuju situacyju ŭsprymaje blizka da serca. Jon razumieje: mnie ciažka na svaje 250 rubloŭ kupić prystojnyja rečy.

Pa słovach mamy, jaje syn nie rabiŭ sprobaŭ samahubstva, u asabistaj hutarcy z kiraŭnictvam skazaŭ: «Mahu bolš nie vytrymać. Što-niebudź z saboj zrablu».

— Synu vysyłaju hrošy nie tolki ja, ale i rodnyja, jaho dziaŭčyna. Ź jaho ździekavalisia maralna, fizična. Viadoma, pajdu na razmovu z kiraŭnictvam, maŭčać nie budu, raz majo dzicia pajšło ŭ vojska zdarovym, to chaču atrymać nazad taksama zdarovaha chłopca, — kaža mama sałdata. - Ciapier syn staŭ skrytnym, dryžyć i baicca niešta skazać.

Z hetaj ža čaści 39 864 u Respublikanskim navukova-praktyčnym centry psichičnaha zdaroŭja na lačeńni znachodzicca jašče adzin sałdat. U razmovie z TUT.BY jaho rodnyja adrazu adznačyli: chłopcu vielmi padabałasia armija, jon zachoplena raspaviadaŭ pra słužbu, pakul jamu nie zrabili apieracyju.

— Synu niapravilna ŭskryli furunkuł nad vokam, zanieśli infiekcyju, pačałosia zaražeńnie kryvi. Jaho ratavali ŭ reanimacyi vajennaha špitala. Fizična syna vylečyli, ale maralna zdaroŭje było padarvana. Prasiŭ ab dapamozie, a 5-ha kastryčnika jaho pakłali ŭ Navinki, - kaža mama sałdata ź Piečaŭ. — Zaraz armija zaklučajecca ŭ hrošach. Jość hrošy — ty ŭ pašanie, niama — ty nichto. Było b praściej adkupicca ad słužby, čym vysyłać tudy.

Sam sałdat, pa słovach maci, nie bačyŭ ničoha strašnaha ŭ tym, što treba było płacić tym, chto pa zvańni vyšejšy. Hrošy jamu vysyłali i mama, i brat. Pierad słužbaj syna žančyna zrabiła sałdatu druhuju kartku, kudy pieraličvaŭsia jaje zarobak. Bolšuju častku jana zdymała, astatnimi hrašyma moh rasparadžacca syn.

— Časam chadziŭ u čypok (bufiet) pa 5 razoŭ na dzień, ja jašče havaryła: «Heta karova moža stolki źjeści, a nie ty». Aburałasia, jon kazaŭ, što heta žyćcio. Darečy, syn zapeŭnivaŭ, što nichto nikoha tam nie biŭ. Zaraz dziedaŭščyna ŭ vojsku budujecca nie ŭ tym, kab kahości bić, jana zaklučajecca ŭ hrošach. Adnojčy za dva dni syšło 45 rubloŭ, bo siaržant dazvoliŭ patelefanavać dadomu, schadzić u čypok. U miesiac niedzie sychodziła pa 100 rubloŭ.

Pavodle infarmacyi TUT.BY, u Navinki taksama nakiravany jašče adzin sałdat, jaki raspačaŭ sprobu samahubstva.

***

Nahadajem, u dadzieny momant Śledčy kamitet rasśleduje hibiel Alaksandra Koržyča ŭ Piečach, adpracoŭvajucca try viersii, siarod jakich zabojstva. Kryminalnaja sprava ŭziata na asabisty kantrol prezidenta.

— Sapraŭdy, na lačeńni ŭ Navinkach zaraz znachodziacca try čałavieki, u tym liku małady čałaviek, jaki napiaredadni hibieli vajskoŭca (Alaksandra Koržyča) sprabavaŭ skončyć žyćcio samahubstvam, ale sproba była papiaredžanaja słužbovymi asobami 72-ha hvardziejskaha abjadnanaha vučebnaha centra. I było vyjaŭlena, što da słužby ŭ vojsku jon čatyry razy sprabavaŭ ździejśnić suicyd, što było ŭtojena svajakami, jak ni sumna heta pryznavać, - kamientuje TUT.BY Uładzimir Makaraŭ, pres-sakratar hałoŭnaha ŭpraŭleńnia ideałahičnaj raboty Minabarony. - Akramia taho, paśla viasnovaha pryzyvu vajennym viedamstvam było vyjaŭlena, što 3,5% sałdat znachodzilisia na ŭliku ŭ psichijatra.

— Jakim čynam jany tady trapili ŭ vojska?

— Zakanamiernaje pytańnie, z hetaj nahody pravodzicca pravierka.

Raniej u ŚMI źjaviłasia infarmacyja, što sałdat, jaki znajšoŭ cieła Koržyča, taksama trapiŭ u RNPC u Navinkach. Minabarony hetuju infarmacyju nie paćviardžaje.

• 0
• 0
• 0
• 0
• 0
• 0
• 0
• 0