Bellingcat śćviardžaje, što znajšoŭ adnaho z asnoŭnych fihurantaŭ pa spravie źbitaha nad Danbasam Boinha-777

U sumiesnym rasśledavańni The Insider i Bellingcat udałosia ŭstanavić asobu klučavoha fihuranta, jaki adšukvajecca Sumiesnaj śledčaj hrupaj pa spravie ab źbitym nad Danbasam małajzijskim Boinhu MH17, — heta hienierał-pałkoŭnik Mikałaj Fiodaravič Tkačoŭ, siońnia hałoŭny inśpiektar Centralnaj vajennaj akruhi Rasii, paviedamlaje The Insider.

Adzin z kurataraŭ dastaŭki vajskovaj techniki z Rasii sieparatystam Danbasa mieŭ telefonny pazyŭny «Delfin». Jahonyja razmovy nakont čarhovych rasijskich kałon braniatechniki, što ŭvachodzili na akupavanuju častku ŭkrainskaj terytoryi, nieadnojčy byli pierachoplenyja ŭkrainskimi śpiecsłužbami.

Toje, što hołas asoby, što rasšukvajecca śledstvam, identyčny hołasu hienierała Tkačova, paćvierdzili dźvie niezaležnyja ekśpiertyzy — u ZŠA i Litvie. Sam Tkačoŭ pry hetym admaŭlaje, što byŭ va Ukrainie.

Mikałaj Tkačoŭ — udzielnik pieršaj i druhoj čačenskich vojnaŭ, słužyŭ u roznych vajennych akruhach, dasłužyŭsia da hienierał-pałkoŭnika i kamandujučaha vajskovaj čaściu 20650, aficyjna rasfarmavanaj 8 vieraśnia 2014 hoda (dva miesiacy paśla krušeńnia Boinha). Pry hetym sam jon byŭ zvolnieny sa słužby ŭkazam ad 10 śniežnia 2010 hoda.

Paśla svajho farmalnaha zvalnieńnia ź lutaha 2011 hoda pa žnivień 2012-ha Tkačoŭ byŭ hałoŭnym vajennym savietnikam u Siryi. 7 žniŭnia 2012 hoda adna z antyasadaŭskich hrup apublikavała videa, dzie siarod inšaha pakazana fatahrafija hienierał-pałkoŭnika Tkačova pobač z hienierał-majoram Kužejevym i ministram abarony Siryi Daudam Radža, jaki zahinuŭ miesiacam raniej pry vybuchu ŭ Damasku.

U videa śćviardžałasia, što Kužejeŭ taksama zabity, ale nieŭzabavie hienierał-major žyvy i zdarovy znajšoŭsia ŭ Rasii. Cikava, što Kužejeŭ, jak i Tkačoŭ, aficyjna pakinuŭ vajskovuju słužbu jašče ŭ 2010 hodzie.

Pavialičyć

Daśledčyki Insajdera mieli pierachopy zvankoŭ «Delfina» z času jahonaha znachodžańnia ŭ tak zvanaj «ŁNR», i vyrašyli patelefanavać jamu, kab atrymać uzor jahonaha hołasu paśla viartańnia ŭ Rasiju, uziaŭšy ŭ jaho intervju pra suvoraŭskuju vučelniu, jakoj jon na toj čas apiekavaŭsia.

Zdabyŭšy hety hałasavy materyjał, jany źviarnulisia ŭ dźvie kryminalistyčnyja łabaratoryi — Nacyjanalny centr miedyja-kryminalistyki štata Kałarada i Departamient fanaskapičnaj ekśpiertyzy Litoŭskaha centra sudovaj ekśpiertyzy.

Abiedźvie niezaležnyja sieryi paraŭnaŭčych testaŭ paćvierdzili vielmi vysokuju vierahodnaść taho, što «Delfin» i hienierał Tkačoŭ heta adna i taja ž asoba. Siońnia źjavilisia paviedamleńni, što ŭrad Niderłandaŭ zacikaviŭsia novymi dadzienymi daśledčykaŭ Bellingcat pa katastrofie rejsu MH-17 14 lipienia 2014 hoda.

U joj zahinuli ŭsie pasažyry i ekipaž łajniera — 298 čałaviek. Vyniki mižnarodnaha niezaležnaha rasśledavańnia pakazvajuć, što samalot razvaliŭsia ŭ pavietry paśla źbićcia rakietaj supraćpavietranaha kompleksa «Buk» rasijskaj vytvorčaści.

• 0
• 0
• 0
• 0
• 0
• 0
• 0
• 0