Historyja z ratviejleram, jaki napaŭ na 72-hadovuju žančynu i zahryz jaje tojterjera, uźniała prablemu biazdomnych žyvioł u Połacku. Ludzi daŭno nie adčuvajuć siabie ŭ biaśpiecy: sabaki biez haspadaroŭ biehajuć pa dvarach, adłavić ci adstralać ich niama kamu. Pałačanie źviartajucca pa dapamohu da kamunalnikaŭ, a tyja kažuć, što vinavatyja sami žychary horada, piša Jeŭraradyjo
Pałačanka Valancina, jakaja žyvie ŭ domie №5 pa vulicy Kastryčnickaj, raspaviała Jeŭraradyjo, što biazdomnyja žyvioły ŭ horadzie pastajanna jaje pałochajuć.
«My z susiedkaj skardzilisia, kab ich adłavili, — kaža Jeŭraradyjo žycharka Połacka. — Ciahajucca hetyja sabaki. Telefanavali, kab adłavili i adstralali. Dniami chadziŭ čorny sabaka pad voknami».
Dyrektar KUP «ŽKH» Połacka Alaksandr Michalevič adkazvaje na heta, što prablema biazdomnych žyvioł jość u lubym horadzie.
«U Połacku niama asobnaj słužby, jakaja zajmajecca adłovam biazdomnych žyvioł, jość tolki bryhada, — raspaviadaje jon Jeŭraradyjo. — My pracujem z dabračynnymi arhanizacyjami, jakija šukajuć haspadaroŭ dla žyvioł. Zvaroty ad ludziej iduć pastajanna. Naša słužba pracuje pa horadzie i rajonie. Ja paćviardžaju, što jość u horadzie biazdomnyja sabaki i katy».
Pa słovach Alaksandra Michaleviča, ŽKH zajmajecca hetaj prablemaj, ale žyvioły «nie prosta tak źjavilisia na vulicach».
«Prablemu ŭ pieršuju čarhu stvaryli ludzi, jakija žyvuć u horadzie. Spačatku sabaki žyvuć u kvaterach, damach, a potym pa niejkich pryčynach akazvajucca na vulicach», — kaža dyrektar połackaha ŽKH.
Dniami ratviejler u Połacku napaŭ na 72-hadovuju žančynu, jakaja hulała sa svaim tojterjeram u dvary. Piensijanierka nie paciarpieła, ale ŭ stanie stresu źviarnułasia da miedykaŭ. Jaje tojterjer zahinuŭ ad atrymanych ran. Ratviejlera zastrelili supracoŭniki milicyi. Ciapier vyśviatlajecca, kamu naležaŭ ahresiŭny sabaka.
Kamientary