9 lutaha ŭ hrupie «Zhublenyja i znojdzienyja žyvioły» apublikavali post pra kata, jakoha vykinuli z akna čatyrochpaviarchoŭki ŭ Sierabrancy. Heta zaŭvažyli nieabyjakavyja minčuki, jakija vyklikali milicyju, paviedamlaje TUT.BY.
Minčuk Juryj žyvie niepadalok ad doma na Plachanava, 83, adkul vykinuli kata. Ciapier Juryj adzin z tych, chto sočyć za stanam žyvioły. Pavodle jaho słoŭ, dniom u subotu da jaho źviarnułasia susiedka i raspaviała, što z susiedniaha doma mužčyna vykinuŭ z akna čaćviortaha pavierchu kata. Žyviołu z raźbitaj pysaj znajšli pobač.
— Ja padyšoŭ praz paru chvilin paśla taho, jak jaho vykinuli. Naš ahulny znajomy byŭ śviedkam taho, što adbyłosia. My vyklikali milicyju na haspadara kata.
Pa słovach Juryja, haspadar — 60-hadovy mužčyna, lubić vypić. Milicyjantam jon patłumačyŭ, što vypadak z katom — «jaho asabistaja sprava».
— Jon skazaŭ, što tak pastupiŭ, bo kot kryčaŭ i chadziŭ na łožak. U milicyi skazali, što, mahčyma, u dačynieńni da jaho zaviaduć kryminalnuju spravu za žorstkaje abychodžańnie z žyviołami.
Paśla hetaha kata advieźli ŭ vietlačebnicu. Vyśvietliłasia, što pry padzieńni ŭ jaho paškodziłasia lohkaje, tresnuła padniabieńnie. U dyjahnazie vietkliniki skazana: «Šok 3 stupieni, pnieŭmatoraks kampiensavany. Mahčyma, udar śpinnoha mozhu, rekamiendavany ahlad nieŭrołaha paśla stabilizacyi pa šoku, rasščapleńnie padniabieńnia».
— Jamu jašče pašancavała, zvyčajna pry padzieńni z takoj vyšyni chrybietniki łamajuć, łapy. My rabili renthien — skazali, što kości cełyja. Ale pakul jon nie moža nahoj varušyć — niejkaje uščamleńnie ci razryŭ. Siońnia kata pavieźli na pryjom da nieŭrołaha, jamu ŭžo lepiej, ale ŭ jaho, viadoma, šok. Jon budzie jašče minimum niekalki dzion adychodzić, — raspaviadaje Juryj.
Niekalki nieabyjakavych da historyi ludziej razam ź Juryjem sočać za stanam kata, šukajuć finansavuju dapamohu. Časovuju pieratrymku ź mieddohladam dla kata znajšli jašče ŭ dzień zdareńnia, ale praciahvajuć šukać dla jaho pastajannych haspadaroŭ.
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?
Kamientary