Sud abviaściŭ prysud pa masavaj «spravie miedykaŭ». Brata Šakucina prysudzili da 1,5 hoda i vyzvalili ŭ zale suda
Siońnia Minski haradski sud abviaściŭ prysud pa hučnaj spravie. Praces doŭžyŭsia bolš za čatyry miesiacy, abvinavačvańnie ŭ atrymańni i davańni chabaraŭ było pradjaŭlena 21 fihurantam, piša Tut.by.
Za hadzinu da abviaščeńnia prysudu ŭ sud stali prychodzić svajaki i siabry abvinavačanych, advakaty i tyja fihuranty, jakija znachodziacca pad chatnim aryštam. Siarod prysutnych — viadomy biznesmen Alaksandr Šakucin, jon pryjšoŭ padtrymać brata Siarhieja Šakucina, jaki abvinavačvajecca ŭ dačy chabaraŭ.
Niekatoryja prykmietna chvalujucca, abmiarkoŭvajuć, jakim moža być prysud. Kali kanvairy adčynili dźviery zały suda, svajaki tych, chto znachodzicca ŭ kletcy, stali machać im rukami. Pa čarzie abvinavačanyja stali zachodzić u zalu, u rukach adnaho ź fihurantaŭ — čornaja spartyŭnaja sumka. Takija sumki biaruć z saboj, kali čałaviek ličyć, što z suda adrazu źjedzie ŭ SIZA.
Adziny, chto nie pryznaŭ vinu — dyrektar kampanii «Iskamied» Siarhiej Šakucin. Astatnija pahadzilisia z abvinavačvańniem abo całkam, abo častkova. Fihurantam abaviazvajuć dva artykuły Kryminalnaha kodeksu: art. 430 (Atrymańnie chabaru), art. 431 (Dača chabaru). Ahulnaja suma chabaraŭ skłała 119 550 dalaraŭ i 26 350 eŭra. Pa viersii śledstva, hrošy pieradavalisia za sadziejničańnie ŭ rehistracyi lekaŭ i miedycynskaj techniki, a taksama pastaŭku lekavych srodkaŭ.
Siońnia sudździa Ihar Lubavicki abviaściŭ prysud. Dyrektar Centra ekśpiertyz i vyprabavańniaŭ u achovie zdaroŭja Alaksandr Stalaroŭ pryznany vinavatym u atrymańni chabaru ŭ asabliva bujnym pamiery i asudžany da 7 hadoŭ pazbaŭleńnia voli ŭ kałonii ŭzmocnienaha režymu. Jaho namieśnik Siarhiej Zinčanka — da 3 hadoŭ pazbaŭleńnia voli, načalnik upraŭleńnia miedycynskaj techniki Centra ekśpiertyz i vyprabavańniaŭ u achovie zdaroŭja Siarhiej Leščyłoŭski — da 3 hadoŭ pazbaŭleńnia voli. Adzinaja žančyna za kratami były namieśnik hienieralnaha dyrektara Viciebskaj «Farmacyi» Kaciaryna Šnitko taksama pryznana vinavataj (č.3 art.430). Jana prysudžanaja da 5 hadoŭ pazbaŭleńnia voli. Andrej Ščuka, jaki ŭznačalvaŭ «Farmacyju» ŭ Hrodnie, - da 2,5 hadoŭ.
Eks-dyrektar «Biełfarmacyi» Viačasłaŭ Hnicij za atrymańnie chabaraŭ atrymaŭ 6 hadoŭ pazbaŭleńnia voli, dyrektar Homielskaha pradpryjemstva «Farmacyja» Natalla Sudakova - 3 hady ŭ kałonii ahulnaha režymu.
Biznesmen Siarhiej Šakucin, jaki nie pryznaŭ vinu ni pa adnym punkcie pa dačy chabaraŭ, prysudžany da 1,5 hadoŭ pazbaŭleńnia voli i vyzvaleny z kletki.
Kiraŭnik «Apteka hrup» Leanid Tomčyn prysudžany da 3 hadoŭ abmiežavańnia voli, jaho vykanaŭčy dyrektar Raman Altšuler - 4 hady abmiežavańnia.
Zasnavalnik «Hieoł-M» Uładzimir Ładućka i Hienadź Sabaleŭski prysudžanyja da štrafu - pa 1 tysiačy bazavych vieličyń. Majiu Naŭbatavu za chabar u 50 jeŭra zasudzili da štrafu 400 bazavych vieličyń, Michaił Haŭryłaŭ - da 4 hadoŭ pazbaŭleńnia voli), Viktar Bałocin - 3 hady abmiežavańnia.
Kamientary