Biznesmien-kamunist, jaki padabraŭ partyju Šuškieviča, sabraŭsia ŭ prezidenty. Što heta za frukt?
34-hadovy biznesmien Siarhiej Čeračań zajaviŭ pra svaje prezidenckija ambicyi. Jaho vyłučaje ŭ kiraŭniki krainy Centralnaja rada Biełaruskaj sacyjał-demakratyčnaj Hramady — partyi, jakaja dastałasia Čeračaniu ad Stanisłava Šuškieviča.
Hramadskaja dziejnaść
Status «partyi» — badaj adzinaje, što ciapier jość u BSDH. Aktyŭ składaje mienš za 100 čałaviek, małazrazumiełaj źjaŭlajecca i novaja ideałohija. Na parłamienckija vybary ad BSDH vyłučałasia tolki 13 čałaviek. Dyj toje bolš za pałovu mandataŭ razdali junakam i dziaŭčatam z «Moładzievaha błoku», jakija nie zachacieli (ci nie zmahli) źbirać podpisy ŭ svaju padtrymku.
Pra palityčnyja pohlady Čeračania viadoma toje, što raniej jon byŭ u šerahach praŭładnaj Kamunistyčnaj partyi. Ale paśla, maŭlaŭ, vyjšaŭ, bo «ŭsie inicyjatyvy raźbivalisia ab ścianu nierazumieńnia».
Aproč kiraŭnictva ŭ BSDH, Čeračań uznačalvaje hramadskaje abjadnańnie «Dypłamatyja».
U hetaj arhanizacyi try hanarovyja členy — eks-kandydat u prezidenty Viktar Ciareščanka, 92-hadovy lotčyk i piśmieńnik Anatol Suljanaŭ, a taksama rasijski deputat-kamunist Uładzimir Biassonaŭ, jakoha pasadzili na try hady, ale nie mohuć złavić.
Adzinaje, čym chvalicca «Dypłamatyja» na svaim sajcie, — tym, što naładžvaje adnosiny z Rasijskim sajuzam vieteranaŭ.
Raniej hramadskaje abjadnańnie Čeračania było zarehistravana ŭ Biełarusi jak «Narodnaja dypłamatyja». Cikava, što ŭ Rasii pa-raniejšamu dziejničaje fond z takoj nazvaj. Jon zajmajecca supracaj z krainami byłoha SSSR, źviazany z «Rumołam».
Biznes
U šmatlikich ankietach uzhadvajucca mnohija kampanii, da jakich maje dačynieńnie Čeračań.
U jakoj śfiery pracavała TAA «Mantaž Technika», zrazumieła z nazvy. Praŭda, hod tamu kampanija była likvidavanaja.
Inšy biznes, TAA «Infarmacyjny śpiektr», taksama ŭ stadyi likvidacyi. Padatkaviki zakryvajuć jaho, bo kampanija nie zajmałasia nijakaj dziejnaściu dva hady.
Pry hetym u Čeračania zastajecca infarmacyjny sajt Spektr.by. Heta zvyčajny ahrehatar navinaŭ, jaki nadaje asablivuju ŭvahu aśviatleńniu dziejnaści BSDH. Sajt maje niašmat naviednikaŭ, servis Similarweb nie ličyć ich praz małalikaść.
Ciapier kiraŭnik partyi pradstaŭlajecca jak «hienieralny dyrektar hrupy kampanij Diin». U dužkach udakładniajecca, što hety biznes źviazany z pastaŭkami zapčastak da biełaruskaj techniki. Zhadak pra takuju «hrupu kampanij» u internecie vobmal.
Zapčastkami da sielskahaspadarčaj techniki zajmajucca i TAA «Pramyja inviestycyi», dyrektaram jakoj paznačaje siabie Čeračań, i TAA «Mahirus».
Niedzie na miažy hramadskaj dziejnaści i biznesu znachodziacca inviestycyi Čeračania ŭ «Biełhazietu».
Siamja
Žonka palityka Maryja Chodzič vałodaje viasielnym sałonam «Mery Mi». Razam ź Siarhiejem jany hadujuć dačku Emiliju, joj piać hadoŭ.
Najbolšy intares vyklikaje cieść palityka, biznesmien Andrej Chodzič. Jon chadziŭ na parłamienckija vybary — 2016 u jakaści kiraŭnika spraŭ sajuza «Ajčyna». Heta abjadnańnie aktyvistaŭ, jakija vystupajuć za dałučeńnie Biełarusi da Rasii.
Kamientary