U kancy minułaha tydnia ŭ Baranavičach stali raspaŭsiudžvacca čutki pra śmierć maleńkaha chłopčyka. Nibyta dzicia pamierła ŭ balnicy ad infiekcyi, jakuju zanieśli pry naviedvańni adnoj z baranavickich stamatałohij. Što nasamreč zdaryłasia, Intex-press prakamientavaŭ Śledčy kamitet.
Baranavickaja dziciačaja haradskaja balnica. Fota: Intex-press.
Pa čutkach, paśla naviedvańnia zubnoha lekara ŭ chłopčyka niekalki dzion baleŭ zub, a potym pavysiłasia tempieratura. Dzicia dastavili ŭ balnicu, dzie praź niekalki dzion jano pamierła. Pryčyny śmierci vykazvalisia roznyja, chtości navat śćviardžaŭ, što chłopčyk pamior ad mieninhitu.
U Śledčym kamitecie paćvierdzili fakt śmierci 4-hadovaha dziciaci ŭ Baranavičach. Jak raspaviała Intex-press Julija Hančarova, aficyjny pradstaŭnik Śledčaha kamiteta, 20 studzienia chłopčyk z vostrym zubnym bolem byŭ špitalizavany ŭ balnicu, dzie pamior 24 studzienia. Zaraz pryznačana sudova-miedycynskaja ekśpiertyza dla vyznačeńnia dakładnaj pryčyny śmierci dziciaci. Papiarednie «śmierć chłopčyka nie maje prykmiet kryminalnaha charaktaru i nie źviazanaja ź virusnymi zachvorvańniami».
Pravodzicca pravierka.
Kamientary