Sieviaryniec zajaviŭ, što na Bieraściejščynie na prajmieryz masava pryjšli čynoŭniki, kab prahałasavać za Hubareviča

Lidar Biełaruskaj chryścijanskaj demakratyi (BCHD) Pavieł Sieviaryniec apavioŭ «NN», što ŭ troch apošnich haradach Bresckaj vobłaści, dzie prachodzili prajmieryz, naziraŭsia vialiki napłyŭ miascovych čynoŭnikaŭ.

Pavialičyć

«Jak mianie prainfarmavali ludzi sa Stolina, siońnia na miascovych prajmieryz była vialikaja jaŭka ludziej z adździeła ideałohii, adździeła adukacyi i BRSM. Jany pryjšli masava, ich źbirali admysłova.

Ludzi z majho štabu pahladzieli, što jany hałasavali za kankretnaha čałavieka — Jurasia Hubareviča. Dy tyja asabliva i nie chavali.

Pry hetym ja naŭrad ci dumaju, što sam Juraś moža viedać pra heta. Budziem zaŭtra dumać, što z hetym rabić», — adznačyŭ Pavieł Sieviaryniec.

Pa słovach Sieviarynca, jaki na hety momant lidziruje ŭ prajmieryz, takoje samaje nazirałasia i ŭ Pinsku, i ŭ Drahičynie. Va ŭsich hetych haradach pieramohu atrymaŭ Juraś Hubarevič.

Mark Šahun, jaki arhanizoŭvaŭ sustreču ŭ Stolinie, raskazaŭ «NN», što na pieradvybary ŭ hetym horadzie pryjšła sakratarka staršyni rajvykankama, ludzi z adździełaŭ ideałohii, adukacyi, kultury. «Pa majoj infarmacyi, byŭ zahad prychodzić na sustreču», — skazaŭ Šahun.

Juraś Hubarevič zaŭvažaje, što čynoŭniki pačali prychodzić jašče ŭ Miorach. «Tam ja nabraŭ nul hałasoŭ. Značyć, namieśnik staršyni miascovaha rajvykankamu jaŭna hałasavaŭ nie za mianie, — kaža palityk. — Čamuści Pavieł źviartaje ŭvahu tolki na tyja harady, dzie jon prajhraŭ.

Byli čynoŭniki i žurnalisty rajonak u Lepieli i Biarozie. I ja nie vyklučaju, što hetyja čynoŭniki i ideołahi hałasavali za Sieviarynca, jaki atrymaŭ bolšaść i ŭ Miorach, i Lepieli, i Biarozie», — zaznačaje Hubarevič.

«Ja ciapier pracuju ź vielmi dobraj kamandaj ludziej, jakija dapamahajuć mnie dahrukvacca da vialikaj kolkaści vybarcaŭ praz haradskija čaty, supołki ŭ sacsietkach. I ja baču vynik hetaj pracy — u Pinsku da mianie padychodziła moładź, dziakavała, što ja adziny daŭ abviestku ŭ sacsietkach, tamu jany pryjšli i padtrymali mianie. My narešcie stali vychodzić na niezaanhažavanuju aŭdytoryju, jakaja moža hałasavać inakš, čym u pieršych haradach», — adznačyŭ kiraŭnik Ruchu «Za Svabodu».

16 sakavika kandydaty abmiarkujuć, ci praciahnuć pajezdki pa rehijonach u suviazi z raspaŭsiudam karanavirusu, a taksama, ci rabić niešta z udziełam čynoŭnikaŭ.

Cikava, što padobnuju taktyku vykarystoŭvajuć i ŭ ZŠA. Naprykład, na prajmieryz ŭ štacie Paŭdniovaja Karalina, dzie hałasavać majuć prava, jak demakraty, hetak i respublikancy, prychilniki Trampa masava padtrymali Bierni Sandersa jak bolš zručnaha supiernika. Mahčyma, što biełaruskija ŭłady pieraniali taki amierykanski padychod.

Pakul u prajmieryz lidziruje Pavieł Sieviaryniec (339), ale Juraś Hubarevič (201) skaraciŭ adstavańnie, atrymaŭšy pieramohi ŭ Drahičynie, Pinsku i Stolinie.

• 0
• 0
• 0
• 0
• 0
• 0
• 0
• 0