«Pajšła chvala pavahi, bo nie pakinuŭ hvałtu i biezzakońnia biez uvahi». Dźmitryj Kachno raspavioŭ, jak jaho źniali z efiru
Šoumen i papularny televiadoŭca Dźmitry Kachno ŭ intervju Radyjo Svaboda tłumačyć, čamu jon nia moh nie napisać post «Tak nielha!», za jaki faktyčna papłaciŭsia pracaj na ANT. Jon raskazvaje, za što jaho raniej zvalniali z BT i STV i čamu jahonaja «relihija — kapitalizm». I pryznajecca, što novych prapanoŭ ad telekanałaŭ pakul niama.
Dniami niaźmiennaha viadoŭcu prajektu ANT i «Eŭraopta» «Ŭdača ŭ prydaču» Dźmitryja Kachno zamianili inšym viadoŭcam, a ŭ apošni momant da taho ž adchilili ad viadzieńnia imprezy z nahody adkryćcia hrandyjoznaha fantanu na Śvisłačy. Pryčyna — post u «Instahramie» «Tak nielha», dzie jon aburajecca žorstkim razhonam čarhi kala kramy Symbal.by.
«Nijakich razmoŭ z kiraŭnictvam ANT u mianie nie było — u adroźnieńnie ad Mielity Staniuty»
— Dźmitry, pieršaje pytańnie mnie padkazaŭ uładalnik kramy Symbal.by Pavał Biełavus. Čamu za vas nie zastupiŭsia «Eŭraopt», bo «Ŭdača ŭ prydaču» — heta ž ich reklamny prajekt? A «chto płacić, toj i muzyku zamaŭlaje», praŭda ž?
— Nakolki mnie viadoma, «Eŭraopt» pieradaŭ vytvorčaść prahramy «Udača ŭ prydaču» i pryniaćcie rašeńniaŭ telekanału ANT. I ciapier ANT vyrašaje, chto pojdzie ŭ efir.
— A vam niešta patłumačyli nakont pryčyn admovy? Jakim čynam heta ŭsio adbyłosia? Moža, sam kiraŭnik telekanała Marat Markaŭ ci chto inšy?
— Nie było nijakich tłumačeńniaŭ. Ja patelefanavaŭ administratarcy zdymačnaj hrupy nakont nastupnaha efiru, i jana mnie paviedamiła, što było pryniata rašeńnie abnavicca i pamianiać viadoŭcaŭ. Bolš nijakaj infarmacyi ŭ mianie niama. A što da kiraŭnictva telekanała, to ŭ mianie naahuł nikoli nie było ni sustreč, ni razmoŭ ź imi. Ja nie kantaktuju z kiraŭnictvam, ja kantaktuju tolki z tymi ludźmi, jakija zaprašajuć mianie na prajekt. Heta albo kiraŭniki prajektu, albo administratary zdymačnaj hrupy. Tamu nijakich razmovaŭ z kiraŭnictvam u mianie nie było — u adroźnieńnie ad Mielity Staniuty.
— Ja čuła, što vas jašče adchilili ad viadzieńnia imprezy z nahody adkryćcia fantanu na Śvisłačy ŭ Dzień Respubliki…
— Tak, mnie pryjšło SMS-paviedamleńnie, što ja nia budu vieści hetuju imprezu, choć maja kandydatura była zaćvierdžanaja zahadzia. Dalejšaj sytuacyi ja nia viedaju. Moža, moj hanarar byŭ vyšejšy, a znajšli kahości za mienšy.
— Mo štości jašče sarvałasia, niejkija inšyja kancerty, imprezy?
— Nakolki mnie viadoma, ja byŭ adnym z kandydataŭ na viadzieńnie konkursu «Mis Biełaruś — 2020». Ale konkurs nie adbyŭsia praz karanavirus.
«Zdymajuć nie za štości kankretnaje. A prosta staviać pierad faktam: vy bolš nia budziecie vieści prahramu»
— Pajšła čarada adchileńniaŭ ad efiru viadomych televiadoŭcaŭ: zhadanaja vami Mielicina Staniuta, Dzianis Dudzinski, Dźmitry Uranhiel. Jak vy dumajecie, heta pieradvybarčaja začystka niazhodnych, niadobranadziejnych, ci što heta? I naahuł, ci davodziłasia vam balansavać, što možna kazać u efiry, a što nie?
— Ja budu adkazvać tolki za siabie. Ja zaŭsiody z ekrana televizara kazaŭ tolki toje, što ja chacieŭ kazać, toje, što ja dumaju. Z 2009 hodu, kali ja pačynaŭ z ekanamičnych navinaŭ na telekanale BT-1. Z momantu znajomstva ź Dzianisam Kurjanom i pačatkam vytvorčaści prahramy «Dziełavoje žyćcio».
I pieršaja parada, jakuju ja pačuŭ ad kaleh-žurnalistaŭ ekanamičnaha adździełu, hučała tak: «Tabie nikoli nie pavinna być soramna za toje, što ty kazaŭ z ekrana televizara». Ja prytrymlivajusia hetaha i pa siońniašni dzień. I, nakolki ja pamiataju ŭsie svaje efiry, u mianie heta atrymlivajecca.
A pakazvać mianie krainie pa televizii ci nie — rašeńnie zaŭsiody prymaje televizijnaje kiraŭnictva. Kaliści mianie ŭžo zdymali z efiru. Heta było, zdajecca, u 2011 hodzie.
— Za što?
— Zdymajuć nie za štości kankretnaje. A prosta kažuć: vy bolš nia budziecie vieści prahramu. Tady na «Chartyi-97» vyjšaŭ artykuł «Viadoŭcy BT krytykujuć režym u fejsbuku». I tam byŭ moj post.
«Adzinaje mahčymaje vyjście, kab raskazvać pra štości praŭdziva, — užyvać «ezopavu movu». Toje, što nielha kazać naŭprost, možna vykazać navat nie padtekstam, a «trecim dnom». Dastań jazyk Ezopa i havary!», — napisaŭ tady Dźmitry Kachno.
Mianie, darečy, zvalniali jašče i z STV u 2016 hodzie — za toje, što ja źjaviŭsia ŭ efiry ANT.
«Maja relihija — kapitalizm»
— U Biełarusi ŭsie telekanały dziaržaŭnyja: BT, ANT, STV. U našych susiedak — Ukrainy, Polščy, Litvy — proćma kamercyjnych, niedziaržaŭnych kanałaŭ. Jak vy ličycie, ci narmalnaja ŭ krainie sytuacyja z televizijaj?
— Ja liču, što maja relihija — kapitalizm. I tamu, biezumoŭna, kamercyjnaja televizija, jak i kamercyjnyja arhanizacyi, pryvatnaja ŭłasnaść — heta zaŭsiody dla mianie plus, a nia minus. Ale pakul u nas hetaha niama. Tut my možam źmirycca tolki z faktam. Pakul niama, budziem čakać i spadziavacca. I, moža, sprabavać niešta rabić samim.
— Ale ž žyćcio karotkaje, i jano vielmi imkliva prachodzić.
— Tady treba paśpiavać pražyvać kožny dzień sumlenna i ščaśliva.
— Televizija — heta jak narkotyk, usie kalehi kažuć, što heta zaciahvaje: žyvyja efiry, emocyi, varušniak. Tym bolš vy viali nia tolki prahramy, a taksama kancerty, roznyja imprezy. Nia budziecie sumavać biez efiraŭ?
— Zrazumieła, mnie prykra, što nia maju mahčymaści vieści vialikija kancerty, masavyja imprezy. Heta cikava, heta enerhietyčna vielmi pazytyŭna, heta z punktu hledžańnia prafesijnaha rostu vielmi zachaplalna i karysna. Ja nia budu chłusić, što ščaślivy, što ničoha nie rablu siońnia. Viadoma, heta nia raduje. Tamu spadziajusia na lepšaje. Ale ja nikoli nie parušu iścinu, jakuju ŭ 2009 hodzie «ŭvabraŭ» svajoj kryvioju. Mnie nikoli nie było soramna za toje, što ja kažu z ekrana televizara.
— A ci majecie niejkija inšyja prapanovy, plany, źviazanyja z televizijaj?
— Kali kazać mienavita pra televiziju, nijakich prapanoŭ niama. Ale ja nia ŭpeŭnieny, što leta — heta spryjalny sezon dla televizii. Zvyčajna na leta TV «zasynaje». Tolki vybary sioleta dapamahajuć televizii praciahvać sezon.
A što tyčycca majoj asnoŭnaj dziejnaści, jakaja prynosić mnie hrošy, — biznes-mierapryjemstvy, zdymki reklamy, Instagram u tym liku, — ja b skazaŭ, što, napeŭna, pajšła novaja chvala papularnaści i pavahi za toje, što ja nie pakinuŭ hvałt i biazzakońnie biez svajoj uvahi.
«Moj post byŭ nie pra palityku. Jon byŭ pra biaśpieku hramadzian Biełarusi»
— Ci nie škadujecie, što napisali taki praniźlivy post «Tak nielha!», praź jaki ŭ vas ciapier prablemy? Ciapier składanaje pieradvybarčaje stanovišča, ja b skazała, navat nervovaje. Moža, varta było pramaŭčać?
— Ja b, napeŭna, pramaŭčaŭ, kali b moh. Ale tady prosta nia zmoh. Ja vykazaŭsia pra hvałt, kali bajcy AMAP chapajuć ludziej z čarhi ŭ kramie ŭ centry horadu. Ja liču, što tak nielha, tak być nie pavinna. Mianie nie prarvała. Ja prosta liču, što tak nielha. Ja razumieŭ, što heta budzie na škodu majoj karjery. I ŭ toj ža čas spadziavaŭsia, što nie.
Ja, praŭda, niekalki razoŭ dumaŭ paśla, ci treba było pisać. Ale nie znajšoŭ inšaha adkazu — tak, treba, ja abaviazany byŭ heta skazać. Ja ludziam abaviazany svajoj karjeraj, svajoj prafesijaj. I hetyja ludzi ŭ mianie zapytalisia majoj dumki — ci narmalna tak razhaniać čarhu kala kramy? I ja adkazaŭ sumlenna, jak ja liču.
— Ale heta ž nia pieršy «chapun». Za tydzień da incydentu kala kramy Symbal.by chapali i sadžali ludziej u aŭtazaki kala filarmonii i HUMa. Byli žorstkija razhony i začystki i raniej. Čamu vas «prarvała» mienavita ciapier? Što stała apošniaj kroplaj?
— Ja heta pabačyŭ užyvuju. Nie ŭ sacyjalnych sietkach, nie ŭ internecie. I heta mianie ŭzrušyła. Zdajecca, u 2013 hodzie ja bačyŭ, jak niejki pomnik zakidali jajkami. I ja nia ŭbačyŭ u vačach hetych ludziej mary pra lepšaje žyćcio ŭ Biełarusi. A toje, što ja pabačyŭ kala kramy Symbal.by, mianie całkam rasčaravała. Tamu moj post byŭ nie pra palityku. Moj post byŭ pra biaśpieku hramadzian Biełarusi, žycharoŭ horadu Miensku. I pra toje, što pravaachoŭnyja orhany, na moj pohlad, nia majuć prava na vyjezd z pryčyny bojki vysyłać aŭtazak z AMAPam. Mnie zdajecca, zaŭsiody ŭ takich vypadkach pryjaždžaje dziažurny aŭtamabil milicyi, a nie aŭtazak z bajcami AMAPu.
— Ja razmaŭlała z mnohimi tvorčymi asobami, nie zaanhažavanymi ŭ palityku — aktorami, litaratarami, moładździu. Mnohija rasčaravanyja. A šmat maładych ludziej kažuć, što kali ničoha nia źmienicca ŭ krainie, jany źjeduć. Mnie vielmi niajomka, što svaimi pytańniami ja daviała našu opernuju dzivu Marharytu Laŭčuk, jakaja napisała pranikniony post u fejsbuku, da śloz. Vaša dumka, ci varta čakać źmienaŭ?
— Majo pačućcio empatyi, mahčyma, nie na takim vysokim uzroŭni, jak u čaroŭnaj Marharyty Laŭčuk. I chłopčyki mienš sentymentalnyja, čym dziaŭčatki. Ale ja vykažu svajo pažadańnie: ja maru, kab ludzi nie chacieli źjaždžać sa svajoj krainy, kab u ich była mahčymaść u hetaj krainie sumlennym šlacham rabić karjeru i dasiahać ščaślivych čałaviečych vyšyniaŭ.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie4
Kamientary