Łukašenka pra situacyju ŭ Biełarusi: Vajennaja padtrymka vidavočnaja — pierasoŭvańnie vojskaŭ NATA da miežaŭ
Padčas naviedvańnia vajennaha palihona pad Hrodna Alaksandr Łukašenka raskazaŭ, jak bačyć situacyju ŭ krainie.
«Usio zrazumieła. Jak my i mierkavali, usio idzie pa płanie kalarovych revalucyj z uzbudžeńniem unutrypalityčnaj situacyi ŭ krainie. Aryhinalnaść i asablivaść situacyi składajecca ŭ tym, što padklučany źniešni faktar, što byvaje nie zaŭsiody. Zvyčajna jany raskručvajuć unutry, zrynajuć dziejnuju ŭładu. Ale pakolki ŭłada ŭ nas na miescy, žorstka supraciŭlajecca (i nie tolki supraciŭlajecca, ale i kantraluje situacyju), padklučyli źniešni faktar», — pieradaje słovy Łukašenki ahienctva BiełTA.
Na dumku Łukašenki, apanienty chočuć razhrupiravać siły biełaruskich vajskoŭcaŭ i pravaachoŭnikaŭ, adciahnuć ad unutranaj situacyi i napružyć na źniešniaj miažy. Jon ličyć, što adnačasova z hetym idzie aktyvizacyja pratestnych nastrojaŭ i bandytyzmu ŭ hramadstvie.
«Vy bačycie, što jany ŭžo ciahnuć siudy «alternatyŭnaha prezidenta», robiać heta ŭsurjoz, pakolki syplucca zajavy zachodnich dziaržaŭ ab finansavańni, padtrymcy. Vajennaja padtrymka ŭ najaŭnaści — pieramiaščeńnie vojskaŭ NATA da miežaŭ. Jany ŭsio ruchajuć da taho, kab zaciahnuć siudy nibyta novaha prezidenta. Jon źviartajecca da zachodnich dziaržaŭ, u dadzienym vypadku NATA, z metaj abarony nasielnictva. Jany ŭvodziać vojski — i na Biełarusi možna pastavić kryž», — zajaviŭ Alaksandr Łukašenka.
Jon padkreśliŭ, što hetyja dziejańni i adpaviednyja zajavy zachodnich krain — užo pramoje ŭmiašańnie ŭ situacyju ŭ Biełarusi. «Havorka idzie pra finansavańnie, vyciahvańnie nas na pieramovy z ABSIE — zrazumieła, dla čaho jany heta robiać».
Łukašenka daručyŭ ministru abarony i kamandujučamu Zachodnim apieratyŭnym kamandavańniem zrabić usie namahańni, kab «abaranić pierš za ŭsio Zachodniuju žamčužynu Biełarusi z centram u Harodni». «Z pryniaćciem samych žorstkich mier pa abaronie terytaryjalnaj cełasnaści našaj krainy», — padkreśliŭ jon.
Kamientary