Skidzielskich mastakoŭ, što malavali busłoŭ i katoŭ na prypynku, pakarali vialikimi štrafami. I kanfiskavali rovar
U sudzie Hrodzienskaha rajona 17 lutaha skončyŭsia razhlad kryminalnaj spravy žycharoŭ Skidziela Kryściny Pałtaviec i Andreja Apanasoviča. Ich vinavacili pavodle artykuła 341 KK RB (Apahańvańnie zbudavańniaŭ i psavańnie majomaści), piša spring96.org.
Spravu razhladała staršynia Hrodzienskaha rajonnaha suda Hanna Čyleka. Dziaržabvinavaŭca — Maryna Ciareška.
Siońnia Maryna Ciareška zapatrabavała dla Pałtaviec pakarańnie ŭ vyhladzie štrafu ŭ 150 bazavych vieličyń, Andreju Apanasoviču 100 bazavych, plus kanfiskacyju ŭ dziaŭčyny rovara, a ŭ jaho aŭtamabila.
Hanna Čyleka abviaściła prysud: 150 bazavych — Pałtaviec (4350 rubloŭ), 100 — Apanasoviču (2900 rubloŭ).
Aryšt na aŭtamabil pastanavili źniać, pakolki jon pa dakumientach źjaŭlajecca ułasnaściu inšaha čałavieka, a rovar u Pałtaviec kanfiskavali jak srodak, z dapamohaj jakoha ździejśniena złačynstva.
Nahadajem, što pavodle pravaabaroncaŭ, u spravie fihuravała kala 20 roznych epizodaŭ. Pačynajučy z kanca žniŭnia i da 21 śniežnia Kryścina Pałtaviec u roznych miescach Skidziela, a taksama na prypynkach i mastach Hrodzienskaha rajona, u vioskach i miastečkach Savoleŭka, Biruličy, Suchaŭlany, Abuchava, Aziory vykonvała mastackija malunki z roznymi vyjavami. Pry tym nijakich hvałtoŭnych zaklikaŭ ci nieprystojnaściaŭ jana nie malavała. Naadvarot, mastačka navat zamalavała niekalki niecenzurnych nadpisaŭ na abjektach.
Pałtaviec pozna ŭviečary jeździła pieravažna na rovary ŭ roznyja kropki zhadanych miescaŭ i rabiła raznastajnyja vyjavy busłoŭ, katoŭ, dziaŭčat ź bieł-čyrvona-biełymi vałasami, hierba «Pahoni», bieł-čyrvona-biełaja jalinki, byli taksama nadpisy salidarnaści «Žyvie Biełaruś!», «Dałučajsia!», «Ja vychožu», vyjava Ramana Bandarenki.
Z kanca vosieni ŭ niekatoryja miescy Pałtaviec padvoziŭ na svajoj mašynie Andrej Apanasovič. Tak u śniežni jany zrabili try supolnyja vyjezdy, pry tym Apanasovič tolki padvoziŭ Pałtaviec, ale nie dapamahaŭ joj u malavańni.
Ahułam abodvum abvinavačanym naličyli 596 rubloŭ 21 kapiejku — na hetuju sumu nibyta byli naniesienyja straty roznym dziaržaŭnym pradpryjemstvam i ŭstanovam. Hetaja suma vypłačana abvinavačanymi jašče da sudu.
10 śniežnia u pracesie prajšoŭ dopyt abvinavačanych. Prakuror Ciareška doŭha začytvała pieralik epizodaŭ spravy z charakternymi farmuloŭkami kštałtu «cyničny malunak u vyhladzie busła», «čym istotna źniziła estetyčnyja charaktarystyki ścieny płota» i da h.d.
Ciapier čytajuć
Łukašenka paraiŭ uźbiekam šukać vialikija hrošy ŭ Rasii10
Łukašenka paraiŭ uźbiekam šukać vialikija hrošy ŭ Rasii
Pamierła Śviatłana Kurs. U jaje tvorach spałučalisia mahija žyvoha žyćcia i biaźlitasny psichałahizm. A ŭ publičnych vystupach i FB — rezki antyimpieryjalizm i elehantny liryzm1818
Kamientary