Administracyjnaja kamisija Horackaha rajvykankamu nakłała štraf na miascovaha viernika‑pratestanta Piatra Małanačkina. Ad jaho patrabujuć vypłacić miascovamu biudžetu piać bazavych vieličyniaŭ (175 tysiač rubloŭ) za parušeńnie praviłaŭ dobraŭparadkavańnia.
Padstavaj dla abvinavačvańnia staŭ infarmacyjny stend, jaki Piatro Małanačkin zmajstravaŭ kala piaci hadoŭ nazad i vyviesiŭ pamiž drevami na tratuary na praśpiekcie Internacyjanalnym u Horkach.
Na stendzie, što nieadnarazova łamali nieviadomyja, uvieś hety čas vystaŭlalisia knihi, časopisy, brašury relihijnaha źmiestu, a taksama Jevanhielli, jakija kožny minak moh brać sabie zadarma.
Sp.Małanačkin pierakanany, što maje prava bieśpieraškodna raspaŭsiudžvać Božaje słova i nie parušaje biełaruskaje zakanadaŭstva, bo jahonaja infarmacyjnaja vystava nie zaminaje ni ruchu transpartu, ni piešachodam. U svajo apraŭdańnie relihijny aktyvist prademanstravaŭ kamisii fotazdymki raźbitaha tratuaru i łužynaŭ vakoł stendu.
Na dumku viernika, mienavita biaździejnaść kamunalnych słužbaŭ parušaje praviły dobraŭparadkavańnia. Taksama sp.Małanačkin nahadaŭ, što nieadnarazova źviartaŭsia ŭ vykankam z prośbaj uzhadnić miesca raźmiaščeńnia stendu, ale nie atrymaŭ stanoŭčaha adkazu. Nie pierakanaŭ administracyjnuju kamisiju i toj fakt, što niadaŭna miascovy sud pakaraŭ za chulihanstva žychara Horak, jaki sprabavaŭ złamać relihijnuju vystavu Piatra Małanačkina.
Kamientary