Rasijskaha pałkoŭnika ŭ adstaŭcy Uładzimira Kvačkova departavali paśla taho, jak jon pieradaŭ u administracyju Łukašenki list z prapanovami, jak źmianić vybarčuju sistemu ŭ Biełarusi, piša Radyjo Svaboda.
U videaroliku na YouTube Kvačkoŭ raskazaŭ, što pryjechaŭ u Minsk na kanfierencyju «Ruś — adzinaja ajčyna» I adrazu pa pryjeździe zanios u administracyju Łukašenki adkryty list z prapanovaj vybirać zamiest deputataŭ ciemnikaŭ, a zamiest pałaty pradstaŭnikoŭ — viarchoŭny ziemski saviet.
U toj ža dzień jon vystupiŭ na kanfierencyi z dvuma dakładami i atrymaŭ hramatu za aktyŭny ŭdzieł u joj. A praz 24 hadziny jaho vysłali z zabaronaj ujezdu na 10 hadoŭ.
Kanfierencyja prachodziła z 9 da 11 krasavika ŭ Respublikanskim kulturna-aśvietnickim centry Upraŭleńnia spravami prezidenta (budynak KZ «Minsk»).
Kvačkoŭ słužyŭ u Hałoŭnym raźviedvalnym upraŭleńni Hienštaba Rasii. Na pačatku 2000-ch udzielničaŭ u rabočaj hrupie ministerstvaŭ abarony Biełarusi i Rasii pa ŭnifikacyi zakanadaŭstva. U 2005 hodzie jaho abvinavacili ŭ zamachu na Anatola Čubajsa i ŭziali pad vartu. Praz try hady sud jaho apraŭdaŭ.
U 2009 hodzie Kvačkoŭ stvaryŭ niezarehistravanuju arhanizacyju «Narodnaje apałčeńnie imia Minina i Pažarskaha». U 2015 jaje pryznali ŭ Rasii terarystyčnaj.
U 2010 hodzie Kvačkova znoŭ aryštavali i praz try hady asudzili za arhanizacyju ŭzbrojenaha miaciažu i teraryzm. Pavodle FSB, jon z paplečnikami źbiraŭsia zachapić zbroju ŭ vajskovych častkach i zładzić pachod na Maskvu, kab zrynuć uładu. Kvačkoŭ viny nie pryznaŭ. Na volu jon vyjšaŭ u 2019 hodzie. Ciapier jamu 72 hady. Nazyvaje siabie ruskim chryścijanskim nacyjanalistam i prychilnikam ruskaj pravasłaŭnaj dziaržavy.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?
Kamientary