CNN apublikavaŭ materyjał pra mahčymy łahier dla palitviaźniaŭ pad Minskam. Nasamreč heta vajskovaja baza
Telekanał CNN vypuściŭ siužet pra mahčymaje stvareńnie ŭ Biełarusi łahiera dla «palityčnych dysidentaŭ».
Kala pasiołka Navakołasava, što za 67 km ad Minska, zhodna ź videazapisami CNN, źjaviŭsia łahier dla źniavolenych. U saviecki čas na hetym miescy było rakietnaje schovišča. Terytoryja płoščaj 81 hiektar abniesienaja tryma šerahami płatoŭ z kalučym drotam pad napružańniem. Vakoł ustalavanyja kamiery videanazirańnia, a na bramie visić šylda: «Uvachod zabaronieny».
Za płotam stajać niekalki kazarmiennych budynkaŭ, a pa terytoryi chodziać ludzi ŭ kamuflažy. CNN adznačaje, što žurnalistam nie ŭdałosia trapić na terytoryju pabudovy, i niezrazumieła, ci jość tam źniavolenyja.
Miascovyja žychary nazyvajuć pabudovu «łahieram». Niadaŭna adnamu z žycharoŭ vajenny achoŭnik zahadaŭ pakinuć terytoryju, kali jon padyšoŭ bližej da łahiera. «Moj siabar Saša, budaŭnik, kazaŭ mnie, što jany adramantavali heta miesca. Tam try šerahi kalučaha elektryfikavanaha drotu. Ja źbiraŭ tut hryby, ale achoŭnik padyšoŭ i skazaŭ, što tut chadzić nielha», — adznačyŭ miascovy žychar CNN.
Supracoŭnik zachodniaj vyviedki paviedamiŭ CNN, što vykarystańnie abjekta ŭ jakaści łahiera dla palitźniavolenych mahčyma, ale pramych dokazaŭ hetamu ŭ jaho niama. Ułady Biełarusi nie adkazali na zapyt CNN prakamientavać situacyju.
Pradstaŭleny ŭ siužecie abjekt dobra viadomy biełaruskim stałkieram, piša Zerkalo.io. Heta były 25-y arsienał rakietnych vojskaŭ stratehičnaha pryznačeńnia SSSR, jaki raźmiaščaŭsia ŭ zakrytym vajennym haradku Stoŭbcy-2. Zaraz heta siało Navokołasava Staŭbcoŭskaha rajona Minskaj vobłaści.
Raspovied pra kompleks taksama źjaviŭsia na telekanale ANT. U siužecie kažuć, što heta režymny abjekt. Tut zachoŭvajucca bajavyja ŭzory zienitnych rakiet, radyjotechničnych vojskaŭ i vojskaŭ SPA. Biełaruskija reparciory zajšli ŭ budynki kompleksa, pakazanyja ŭ siužecie CNN. Akazałasia, što heta zvyčajnyja słužbovyja i składskija pamiaškańni.
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam17
Kamientary