Biełaruś rychtujecca prymać da 40 rejsaŭ u tydzień sa Stambuła, Damaska i Dubaja
Da sakavika aeraport biełaruskaj stalicy rychtujecca štotydzień prymać blizu 40 rejsaŭ na tydzień sa Stambuła, Damaska i Dubaja, piša niamiecki štotydniovik Welt am Sonntag. Heta ŭdvaja bolš, čym pazaminułaj zimoj.
Biełaruś značna pavialičyła kolkaść avijarejsaŭ z krain Blizkaha Uschodu ŭ Minsk, paviedamiŭ u niadzielu, 7 listapada, niamiecki štotydniovik Welt am Sonntag sa spasyłkaj na aktualnyja danyja ab prybyćci samalotaŭ u aeraport biełaruskaj stalicy. Pavodle hetych źviestak, da sakavika z aeraportaŭ Stambuła, Damaska i Dubaja ŭ Minsk zapłanavany štotydzień kala 40 rejsaŭ. Pavietranyja havani hetych haradoŭ ciapier čaściej za ŭsio vykarystoŭvajuć mihranty dla pramych pieralotaŭ u Biełaruś, kab adpravicca dalej u krainy ES.
Takim čynam, kolkaść rejsaŭ z rehijonu ŭ Minsk vyrasła bolš čym udvaja ŭ paraŭnańni ź zimoj 2019-2020 hadoŭ, adznačaje hazieta. Tady ŭ Minsku ŭ tydzień pryziamlalisia kala 17 samalotaŭ z hetych i inšych aeraportaŭ na Blizkim Uschodzie. Kolkaść palotaŭ, jak paviedamlajecca, jašče skaraciłasia paśla pačatku pandemii karanavirusa.
Ciapier u Biełaruś štodnia prybyvajuć kala 800-1000 mihrantaŭ, śviedčać danyja niamieckich śpiecsłužbaŭ, jakija pryvodzić Welt am Sonntag. U suviazi z hetym, pa infarmacyi vydańnia, nieŭzabavie mohuć być zadziejničany dla absłuhoŭvańnia rejsaŭ z krain Blizkaha Uschodu jašče piać biełaruskich aeraportaŭ. Jany pieratvoracca z nacyjanalnych u mižnarodnyja.
Hiermanija i inšyja krainy Jeŭrapiejskaha Sajuza abvinavačvajuć Alaksandra Łukašenki ŭ tym, što jon naŭmysna pravakuje mihracyjny kryzis, arhanizavaŭšy pierapraŭku tysiač nielehalnych mihrantaŭ da miežaŭ ES u adpłatu za sankcyi, jakija Jeŭropa ŭviała suprać jaho režymu.
Ciapier čytajuć
Mužčyna ŭ minskim mietro łapaŭ dziaŭčat, z vyhladu padletkaŭ, i pakazvaŭ im pachabnyja žesty. Jaho zatrymali14
Kamientary