«Možna prosta piačy bułki». Vysokapastaŭleny vykanaŭca represij uvieravaŭ u Boha i syšoŭ ź milicyi
Maksim Hryščanka byŭ viadomy svajoj rollu ŭ padaŭleńni naroda z 2000-ch. Adnak u 2021-m pałkoŭnik vyjšaŭ ź sistemy, adkryŭ IP i zaniaŭsia vysakarodnaj spravaj — piače chleb. Taksama jon naviarnuŭsia ŭ pratestanctva i źmianiŭ imidž.
Nievyrazny mužčyna ŭ ciomnych kaściumach i kurtkach, časta ŭ kiepačcy i z racyjaj, Hryščanka niaźmienna kiravaŭ aryštami demanstrantaŭ u Minsku jašče z 2000-ch.
Jon addavaŭ zahady na «vinciłava» i sam prykładaŭsia. Tak, jon nahami biŭ fatohrafku Juliju Daraškievič.
Hryščanka dabyŭ na słužbie da padziej 2020-ha. Jaho apošniaja pasada — namieśnik sumnaviadomaha Ihara Padvojskaha, načalnika milicyi hramadskaj biaśpieki HUUS Minharvykankama.
Ale z Hryščankam niešta zdaryłasia.
Napačatku 2021-ha jon, jak stała viadoma «Našaj Nivie», syšoŭ z karnaha aparata ŭ inšuju śfieru. Adkryŭ IP i staŭ piačy chleb!
Razam z hetym 46-hadovy adstaŭnik kardynalna źmianiŭ imidž.
Što prymusiła niekali «hałoŭnaha pa padaŭleńni niazhodnych u Minsku» syści ź sistemy ŭ razhar represij — na pačatku 2021-ha?
Sam Hryščanka «Našaj Nivie» ničoha nie adkazaŭ.
Ale zdahadku vykazaŭ jaho były kaleha.
«U mnohich ludziej u žyćci nastupaje momant, kali jon azirajecca, aceńvaje, jak jon žyŭ i što zrabiŭ, krytyčna pieraaceńvaje svaju dziejnaść i kaštoŭnaści. Voś u Hryščanki, mnie zdajecca, adbyłasia takaja pieraacenka kaštoŭnaściaŭ.
Ën pryjšoŭ u pratestanckuju carkvu. Ale ja nie viedaju što tut pieršasnaje — admova ad roli karnika jak vynik upłyvu relihii ci relihija jak vynik admovy ad losu karnika. Ën moh by zastavacca ŭ sistemie i mučyć biełarusaŭ dalej, — kaža jaho były kaleha. — Ja rady za jaho, što jon znajšoŭ harmoniju i padaje inšym prykład, što možna zarablać nie tolki saŭdziełam u aryštach i sačeńni. Možna prosta piačy bułki», — prakamientavaŭ čałaviek, jaki słužyŭ z Hryščankam.
Dapoŭnić temu abo paviedamić navinu možna naŭprost aŭtaru pa biaśpiečnym kantakcie ŭ telehram @artsiom_harbatsevich abo na mejł [email protected]
«Naša Niva» — bastyjon biełaruščyny
PADTRYMAĆČytajcie taksama:
«Praź miesiac atrymaŭ pieršy zakaz — zapłacili 150 dalaraŭ». Były ŭčastkovy kinuŭ milicyju i pracuje ŭ IT
Chto taki antyhieroj internetu, milicyjanier Ihar Padvojski, i za što jon nie lubić Čamadanavu
«Chaj nie razumničajuć». Jak kiraŭniki milicyi ŭ 2020-m stavili sudździaŭ na miesca
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club4
Kamientary