Hruzčyka, jaki razhaniaŭ pratesty ŭ 2020-m, asudzili za videa ŭ TikTok
U sudzie Viciebska vynieśli prysud 22-hadovamu hruzčyku kandytarskaj fabryki «Vićba» Alaksieju Hryharoviču. Sudździa Volha Šapavał pryznała jaho vinavatym pavodle art. 369 KK (Abraza pradstaŭnika ŭłady) i asudziła da pazbaŭleńnia voli terminam 6 miesiacaŭ z umoŭnym nieprymianieńniem pakarańnia, paviedamlaje «Viasna».
Heta značyć, što kali ciaham hoda jon, znachodziačysia pad nahladam, nie ździejśnić ničoha, što ŭładzie padasca «złačynnym», jaho nie pazbaviać voli, a taksama zdymuć sudzimaść.
U noč na 18 lipienia 2022 hoda Alaksiej Hryharovič, vypiŭšy, stvaryŭ i raźmiaściŭ u TikTok videazapis z udziełam małodšaha inśpiektara darožna-patrulnaj słužby Uładzimira Vasilkova. Videa supravadžałasia niecenzurnym kamientarom.
Siaržant milicyi ŭspryniaŭ heta jak abrazu, jakaja ŭpłyvaje na jahony aŭtarytet, honar i hodnaść.
Vasilkoŭ admoviŭsia ad pazova ab kampiensacyi maralnaj škody. Jon raspavioŭ, što paznajomiŭsia z abvinavačanym padčas vučoby ŭ kaledžy, ale z tych časoŭ bolš nie kamunikavaŭ ź im. U dzień zdareńnia jon bačyŭ, što Hryharovič zdymaŭ jaho na telefon, zrabiŭ jamu zaŭvahu, kab jon pierastaŭ zdymać, a z ranicy jamu pačali telefanavać znajomyja i raspaviadać, što ŭbačyli videa ź im, na jakim jon stajaŭ na prajeznaj častcy, a Hryharovič pramoviŭ niecenzurny kamientar. Hetaje ž vykazvańnie abvinavačany prapisaŭ na videa tekstam. Videa mieła kala 16-17 tysiač prahladaŭ.
Nastupnaj ranicaj Hryharovič vydaliŭ videa, tamu što jamu stała soramna, kali jon jaho pierahledzieŭ. Paśla hetaha — patelefanavaŭ Vasilkovu, kab vybačycca.
U 2020 hodzie Hryharovič słužyŭ pa kantrakcie va ŭnutranych vojskach i byŭ u «kamandziroŭcy» u Minsku: prymaŭ udzieł u razhonie pratestoŭcaŭ. Padčas apytańnia advakatam jon upeŭniena adkazaŭ, što ŭ 2020 hodzie ŭ Biełarusi byli masavyja biesparadki, a jon chacieŭ, kab u krainie było stabilna, i ŭsio žyćcio padtrymlivaŭ Łukašenku. Jon taksama adznačyŭ, što tady ŭ ich i «mołatavy lacieli — to-bok, ja žyćciom ryzykavaŭ».
«Ja nie mahu zrazumieć, čamu heta ździejśniŭ. Ja vielmi raskajvajusia. Učynak złamaŭ mnie žyćcio. Ja vielmi škaduju. Ja b usio addaŭ, kab viarnucca ŭ toj dzień, prosta padyści, prosta ruku pacisnuć, navat nie dastavać telefon i hetak dalej», — skazaŭ Hryharovič.
Dziaržabvinavaŭca Raman Kraŭcoŭ prasiŭ pryznać abvinavačanaha vinavatym pavodle art. 369 Kryminalnaha kodeksa i pakarać jaho štrafam u pamiery 110 bazavych vieličyniaŭ (3520 rubloŭ). Ale z ulikam taho, što jon adsiadzieŭ troje sutak u IČU, pamienšyć pamier štrafa da 3200 rubloŭ. Sudździa vyrašyła pryznačyć Hryharoviču paŭhoda pazbaŭleńnia voli z adterminoŭkaj.
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary
Łaskava prosim u pabudavanuju stabilnaść, chłopča!