Abjadnany pierachodny kabiniet pryznaŭ Haładamor hienacydam ukraincaŭ
Abjadnanany pierachodny kabiniet pryznaŭ Haładamor hienacydam ukrainskaha naroda i asudziŭ złačynstvy kamunistyčnaj ułady ŭ dačynieńni da nacyjanalnych respublik SSSR u mižvajenny pieryjad. U rezalucyi taksama padkreślivajecca, što masavy hoład adbyvaŭsia i na terytoryi Biełarusi.
«Pastanaŭlajem pryznać złačynnuju palityku kamunistyčnaj dziaržavy suprać naroda Ukrainy, jakaja pryviała da štučnaha hoładu ŭ 1932-1933 hh., aktam hienacydu suprać ukrainskaha naroda i złačynstvam suprać čałaviečnaści. My vystupajem taksama z asudžeńniem hetaha i inšych złačynstvaŭ kamunistyčnaj ułady suprać nacyjanalnych respublik Savieckaha Sajuza ŭ mižvajenny pieryjad», — havorycca ŭ dakumiencie.
U Kabiniecie nahadali, što achviarami masavaha hoładu pačatku 30-ch hh. stali žychary Ukrainy, Kazachstana, Pavołža, Pryčarnaziemja, Zachodniaj Sibiry, Paŭnočnaha Kaŭkaza i inšych rehijonaŭ. U APK padkreślili, što ŭ Biełarusi byli zabityja, raskułačanyja i departavanyja bolš za 250 tysiač sialan, a vialikaja častka biełarusaŭ była zmušanaja da pierajezdu ŭ inšyja rehijony — u tym liku va Ukrainu i na Paŭnočny Kaŭkaz, jakija stali epicentrami hoładu ŭ 1932-1933 hh.
«Pryznajučy padziei Haładamoru aktam hienacydu suprać ukrainskaha naroda, my taksama addajom daninu pamiaci tym šmatlikim biełarusam, jakija stali achviarami hetaha złačynstva na terytoryi savieckaj Ukrainy i Kryma», — napisana ŭ rezalucyi.
Śviedčańni pra masavy hoład na terytoryi samoj Biełarusi ŭ Kabiniecie nazvali «jašče adnym faktam, što złučaje historyju biełaruskaha i ŭkrainskaha narodaŭ i pakazvaje ahulnaść złačynnaj palityki balšavickaha režymu na terytoryi nacyjanalnych respublik».
Rezalucyja zaklikaje da raskryćcia ŭsich dziaržaŭnych archivaŭ u Biełarusi i daśledavańnia dakładnaj kolkaści zahinułych u vyniku dziejańniaŭ savieckaj ułady, a taksama vykazvaje padtrymku i salidarnaść narodu Ukrainy.
Kamientary