Byłoha žurnalista BT asudzili da 4 hadoŭ kałonii, a jaho žonku — da 2,5 hadoŭ

Ich abvinavačvali ŭ «dyskredytacyi Biełarusi», a taksama «aktyŭnym udziele ŭ hrupavych dziejańniach, jakija hruba parušajuć hramadski paradak». Łukša, Pałavinka i Jaroŭski znachodziacca pad vartaj. Žonka Dzianisa Anastasija na sud nie źjaviłasia — jaje abviaścili ŭ vyšuk.

U vyniku sudździa Natalla Buhuk pryznačyła Dźmitryju Łukšu čatyry hady kałonii va ŭmovach ahulnaha režymu i štraf u pamiery 500 bazavych (16 000 rubloŭ), Palinie Pałavincy — dva hady i šeść miesiacaŭ kałonii va ŭmovach ahulnaha režymu i štraf u pamiery 100 bazavych (3 200 rubloŭ), Dzianisu Jaroŭskamu — adzin hod i šeść miesiacaŭ kałonii va ŭmovach ahulnaha režymu i štraf u pamiery 100 bazavych (3 200 rubloŭ), Kanstancinu Nikanoravu — try hady «chatniaj chimii» i štraf u pamiery 100 bazavych (3 200 rubloŭ).

Pavodle viersii abvinavačvańnia, Łukša ź listapada 2021 hoda pa sakavik 2022 hoda «sistematyčna pieradavaŭ zamiežnamu telekanału za ŭznaharodžańnie materyjały pra padziei, jakija adbyvajucca ŭ Respublicy Biełaruś».

«Z metaj dyskredytacyi krainy z dapamohaj apieratara jon vyrabiŭ šerah videasiužetaŭ, jakija ŭtrymlivali zaviedama łžyvuju infarmacyju, i pieradaŭ ich zhadanamu telekanału. U pryvatnaści, u lasnym masivie ŭ ah. Lasny Minskaha rajona pa jaho ŭkazańni žonka — Palina Pałavinka — chavajučy svoj tvar, na anhlijskaj movie pradstaviłasia hramadziankaj Siryjskaj Arabskaj Respubliki, jakaja nibyta pražyvaje ŭ stychijnym łahiery na terytoryi Respubliki Biełaruś. Jana ahučyła zahadzia padrychtavany mužam tekst ź niedakładnymi źviestkami ab niezachavańni pravoŭ mihrantaŭ, niezadavalnieńni ich bazavych patrebaŭ, deficycie vady i ježy, pry hetym Łukša paćvierdziŭ, što asabista naziraŭ nibyta parušeńni».

Abo inšy prykład. Na videazapis, źniaty za miažoj, na jakim demanstravaŭsia deficyt charčovych tavaraŭ i zamiežnaj valuty, Łukša nakłaŭ svoj zakadravy hołas, pry hetym paviedamiŭ, što ŭ siužecie pakazanaja situacyja ŭ Respublicy Biełaruś», — havorycca ŭ abvinavačvańni.

Hetyja i inšyja videasiužety Łukša nakiravaŭ pradstaŭnikam zamiežnaha telekanała, jakija raźmiaścili ich na svaich aficyjnych resursach. 

Akramia taho, pavodle viersii abvinavačvańnia, u 2020 hodzie Łukša, jaho žonka, dvoje inšych abvinavačanych taksama prymali aktyŭny ŭdzieł u hrupavych dziejańniach, jakija hruba parušajuć hramadski paradak u stalicy.

Anastasii Jaroŭskaj taksama staviłasia ŭ vinu toje, što jana raźmiaščała ŭ Instagram paviedamleńni, u jakich jana:

• prynižała pravaachoŭnikaŭ, farmirujučy niehatyŭny sacyjalny stereatyp i varožaje staŭleńnie da biełaruskaj pravaachoŭnaj sistemie i jaje pradstaŭnikoŭ;
• zaklikała pracoŭnych da strajku z parušeńniem ustanoŭlenaha paradku jaho praviadzieńnia, pierakonvajučy ŭ pravilnaści, apraŭdanaści i abhruntavanaści takoha ŭdziełu, tady jak u rečaisnaści jon byŭ nakiravany vyklučna na pryčynieńnie škody nacyjanalnaj biaśpiecy i vykarystoŭvaŭsia jak forma baraćby z uładaj.

Takim čynam, piaci fihurantam spravy inkryminavanyja:

• Dźmitryju Łukšu — art. 369-1 KK (dyskredytacyja Respubliki Biełaruś), č. 1 art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak);
• žoncy Łukšy Palinie Pałavincy — č. 6 art. 16 i art. 369-1 KK (dapamoha ŭ dyskredytacyi Respubliki Biełaruś), č. 1 art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak);
• Dzianisu Jaroŭskamu — č. 1 art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak);
• apierataru Kanstancinu Nikanoravu — č. 6 art. 16 i art. 369-1 KK (dapamoha ŭ dyskredytacyi Respubliki Biełaruś);
• Anastasii Jaroŭskaj — č. 1 art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak); č. 1 art. 130 KK (raspalvańnie inšaj sacyjalnaj varožaści), č. 3 art. art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś).

Paviedamlajecca, što Dźmitryj Łukša pryznaŭ vinu całkam i častkova.

Padtrymajcie palitźniavolenych listami, pasyłkami, hrašovymi pieravodami: SIZA-1, 220030, Minsk, Vaładarskaha, 2, Dźmitryj Michajłavič Łukša, Palina Pałavinka, Dzianis Jaroŭski

• 1
• 0
• 0
• 2
• 0
• 2
• 15
• 0