Aŭstralijca asudzili na 24 hady za zabojstva žonki, ździejśnienaje 40 hadoŭ tamu. A dapamoh u hetym padkast
74-hadovy aŭstralijec Krys Doŭsan, jaki staŭ hierojem papularnaha kryminalnaha padkasta, pryśviečanaha historyi źniknieńnia jaho žonki, prysudžany da 24 hadoŭ turmy za jaje zabojstva. Jon byŭ pryznany vinavatym u žniŭni, u piatnicu sud vynies prysud, piša «Bi-bi-si».
Liniet Doŭsan źnikła pry zahadkavych abstavinach z domu ŭ Sidnei ŭ 1982 hodzie. Joj było 33 hady.
Palicyja nie znajšła śladoŭ hvałtu, i nieŭzabavie sprava była zakrytaja.
Susiedzi i hramadskaść vielmi spačuvali Doŭsanu, jaki zastaŭsia z dvuma małaletnimi dziećmi na rukach.
Aŭstralijskaja presa pieryjadyčna viartałasia da hetaj temy, a ŭ 2018 hodzie vydańnie The Australian Newspaper zrabiła padkast, pryśviečany historyi Doŭsanaŭ pad nazvaj «Lubimčyk nastaŭnika» (The Teacher's Pet).
Hety efir staŭ fatalnym dla Krysa Doŭsana. Niekatoryja detali, jakija prahučali ŭ im, pryciahnuli ŭvahu palicyi, i rasśledavańnie było adnoŭlena.
Śledčyja pryznajuć, što ŭsie sabranyja dokazy — uskosnyja. Cieła Liniet Doŭsan tak i nie znajšli.
Ale sud paličyŭ sabranyja materyjały dastatkovymi dla vyniasieńnia abvinavaŭčaha prysudu.
«Čamu ty ź joj prosta nie raźvioŭsia?»
Padčas ahučvańnia prysudu ŭ piatnicu sudździa Ian Charysan skazaŭ, što karcina złačynstva skłałasia. Pavodle jaho słoŭ, Krys Doŭsan dziejničaŭ śviadoma, paturajučy svaim žadańniam.
Sud pryjšoŭ da vysnovy, što Doŭsan vyrašyŭ pazbavicca ad žonki, kab zastacca ź niepaŭnaletniaj paluboŭnicaj, jakaja padzarablała ŭ ich siamji bebisitaram.
Sudździa Charysan pastanaviŭ, što praz 18 hadoŭ asudžany zmoža prasić ab daterminovym vyzvaleńni, ale pryznaŭ, što 74-hadovy Doŭsan, chutčej za ŭsio, skončyć svaje dni ŭ turmie.
Advakat Doŭsana zajaviŭ, što abarona maje namier abskardzić prysud.
U chodzie sudovaha pracesu Krys Doŭsan adprečvaŭ svajo dačynieńnie da źniknieńnia žonki.
Jon nastojvaŭ na viersii, što, chutčej za ŭsio, jana kinuła jaho i dziaciej, kab dałučycca da niejkaj relihijnaj siekty.
Adnak bok abvinavačvańnia rabiŭ upor na tym, što śledstva dakazała suviaź pamiž Doŭsanam i 16-hadovaj studentkaj, jakaja vučyłasia ŭ kaledžy, dzie jon vykładaŭ.
Sudździa Charysan zrabiŭ vysnovu, što jany byli nie prosta paluboŭnikami, ale što Doŭsan byŭ aślepleny pažadaj da dziaŭčyny, i žonka jamu vielmi zaminała.
Praź niekalki dzion paśla źniknieńnia žonki studentka pasialiłasia ŭ jaho domie. Paźniej jany pažanilisia, ale praź niekatory čas rasstalisia.
Na adnym sa słuchańniaŭ dačka Doŭsanaŭ Šanel, jakoj na momant źniknieńnia maci było čatyry hady, uprošvała baćku skazać, dzie jon schavaŭ cieła.
«Kali łaska, skažy nam, dzie jana», — prasiła jana.
«U tuju noč, kali ty vykraśliŭ našu mamu z našaha žyćcia, ja nazaŭždy straciła pačućcio abaronienaści i apory ŭ hetym śviecie. Heta ŭpłyvaje na mianie ŭsie hetyja dziesiacihodździ. Čamu ty ź joj prosta nie raźvioŭsia? Čamu ty nie pakinuŭ jaje tym, chto lubiŭ i mieŭ patrebu ŭ joj?»— skazała Šanel Doŭsan u sudzie.
Paśla abviaščeńnia prysudu brat achviary Hreh Sims skazaŭ presie, što ŭsia siamja čakała dnia, kali ździejśnicca pravasudździe. Ciapier, pa jaho słovach, ich hałoŭny kłopat — znajści cieła siastry i pachavać jaje jak śled.
Advakat Krysa Doŭsana zajaviŭ, što jaho klijent nie moža nazvać miesca, dzie znachodzicca cieła, bo nastojvaje na svajoj nievinavataści.
U kastryčniku ŭ štacie Novy Paŭdniovy Uels, da jakoha naležyć Sidnej, byŭ pryniaty zakon, jaki zabaraniaje asudžanym za zabojstva prasić ab daterminovym vyzvaleńni ŭ vypadku admovy abvinavačanaha supracoŭničać sa śledstvam i dapamahać sa znachodkaj pareštkaŭ achviary.
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary