Žorstki i chutki razhon akcyi na Kastryčnickaj
Na kožnaha žurnalista było pa adnym-dva milicyjanty ŭ štackim, jakija rukami zakryvali abjektyvy.
Na Kastryčnickaj płoščy Minska a 18-j prajšła tradycyjnaja akcyja salidarnaści z palitviaźniami. Jana tryvała dźvie chviliny i była žorstka razahnanaja. Z 40 udzielnikaŭ akcyi 22 patrapili ŭ RUUS.
Žurnalistam, jak i ŭ minułyja dva razy, nie davali zdymać. Na kožnaha žurnalista było pa adnym-dva milicyjanty ŭ štackim, jakija rukami zakryvali abjektyvy. Alaksieja Maciuškova (fota) zaviali za aŭtobus i tam trymali da kanca akcyi.
21.10
Z RUUS vyjšaŭ apošni čałaviek — Michaś Paškievič.
20.45
Vyjšaŭ Anatol Labiedźka i pačali adpuskać pa adnym astatnich zatrymanych.
Anatol Labiedźka: «Kali zabrali z Płoščy i zaciahnuli ŭ transpart, adzin schapiŭ za horła, adzin trymaŭ za ruki, a treci biŭ. Źbivali, kali zaciahvali ŭ aŭtobus i ŭ aŭtobusie. U mianie palec na ruce nie ruchajecca i padpuch. Adnak nie złamany, zdajecca.
Namieśnik kiraŭnika RUUS Savieckaha rajona Hryščanka — niepryjemnaja asoba. Pakul jon nie pryjšoŭ, milicyjanty viali siabie bolš-mienš prystojna. A hety zusim žorstka pavodziŭ siabie, pastaviŭ usich tvaram da ściany, ja pasprabavaŭ zastupicca za moładź, tamu mianie zakinuli da bamžoŭ».
Padčas zatrymańnia pratakołaŭ u milicyi nie składali. Usie zaznačajuć, što na Płoščy žorstka ŭsich zapichvali ŭ aŭtobusy. Adnak metanakiravana źbivali tolki Anatola Labiedźku. Z astatnimi ŭ aŭtobusie abychodzilisia karektna.
18.55
Adpuścili z RUUS Savieckaha rajona pieršaha čałavieka, niepaŭnaletniaha chłopčyka, pa jakoha pryjechała maci.
18:10
Na płoščy pusta. Akcyja skončana.
Zastalisia žurnalisty i tyja, chto uniknuŭ zatrymańnia. Chodziać žančyny-prybiralščycy.
Śpiecnaz syšoŭ, razychodziacca i asoby ŭ cyvilnym.
18:06
Usich žorstka zatrymlivajuć, źbivajuć, zakidvajuć usich u aŭtobus. Adzin aŭtobus adjechaŭ, padjechaŭ druhi aŭtobus.
Zatrymali ŭsiaho 40 čałaviek.
Siarod zatrymanych — staršynia Abjadnanaj hramadzianskaj partyi Anatol Labiedźka, lider Maładych demakrataŭ Michaś Paškievič, maładafrontaŭcy Nasta Pałažanka, Mikoła Dziemidzienka (jon byŭ zatrymany previentyŭna), kiraŭnik Moładzi BNF Andrej Krečka.
* * *
18:03
Ludzi stanoviacca ŭ šerah, asoby ŭ cyvilnym pačynajuć adciskać žurnalistaŭ, nie dajuć zdymać, advodziać ich pa adnym, a taksama akružajuć tych, chto staŭ u łancuh.
* * *
Ciapier na Płoščy znachodzicca kala 20 čałaviek, jość taksama milicyjaniery i «asoby ŭ cyvilnym». Ź ich bolšaść znachodzicca ŭ pierachodzie mietro, na vychadzie da handlovych radoŭ «Kupałaŭski».
* * *
Užo čaćviorty hod kožny miesiac 16‑ha dnia prachodzić akcyja ŭ padtrymku palitviaźniaŭ i siemjaŭ źnikłych. U roznych haradach Biełarusi i zamiežža ludzi vychodziać na vulicy sa ściahami i partretami, kab pryzvać biełaruskija ŭłady da spynieńnia represij i da palityčnych źmienaŭ u krainie.
16 kastryčnika akcyja «Salidarnaści» maje na mecie nahadać hramadstvu, što ŭ Biełarusi ŭsio jašče jość viaźni sumleńnia:
heta vaŭkavyskija pradprymalniki Mikałaj Aŭtuchovič i Jury Lavonaŭ, a taksama aktyvist «Maładoha Frontu» Arciom Dubski.
Taksama ŭ Biełarusi pa‑raniejšamu nie rasśledujucca spravy ab źniknieńni ŭ 1999‑2000 hadach apazicyjnych lideraŭ Viktara Hančara, Juryja Zacharanki, Anatola Krasoŭskaha i žurnalista Dźmitryja Zavadskaha. U vykradańni hetych ludziej mižnarodnaja supolnaść padazraje vysokapastaŭlenych biełaruskich čynoŭnikaŭ.
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam23
Kamientary