Mazyrčuk atrymaŭ try hady kałonii za pierasyłku videa z rasijskimi vajskoŭcami. Jaho zatrymali pa viartańni z Polščy
Staŭ viadomy prysud žycharu Mazyra Vadzimu Baranavu, jakoha abvinavacili ŭ sadziejničańni ekstremisckaj dziejnaści za toje, što jon źniaŭ videa rasijskaj vajskovaj techniki padčas napadu Rasii na Ukrainu z boku Biełarusi i chacieŭ pierasłać niekatorym telehram-kanałam, paviedamlaje «Viasna».
Spravu mazyranina razhladaŭ sudździa Homielskaha abłasnoha suda Rusłan Caruk. U vinu Vadzimu stavili sadziejničańnie ekstremisckaj dziejnaści pavodle č. 1 i č. 2 art. 361-4 Kryminalnaha kodeksa.
Pavodle viersii abvinavačańnia, Vadzim Baranaŭ «mieŭ namier na sadziejničańnie ekstremisckaj dziejnaści i 26.02.2022 zdymaŭ na videa pieramiaščeńnie vajenizavanych padraździaleńniaŭ nieŭstanoŭlenaj dziaržavy dla pieradačy danych u telehram-kanały, pryznanyja ekstremisckimi, čym akazaŭ sadziejničańnie ekstremisckaj dziejnaści, tym samym ździejśniŭ złačynstva pa č. 1, art. 361-4, a taksama nieadnarazova pieradavaŭ źviestki ab pieramiaščeńni vajennaj techniki ŭ krasaviku 2022 h., tym samym ździejśniŭ złačynstva, praduhledžanaje č. 2 art.361-4».
U sudovym pracesie abvinavačany pryznaŭ vinu i patłumačyŭ, što źniaŭ videa z akna ŭłasnaha doma i sapraŭdy pierasłaŭ jaho ŭ pablik. Pra toje, što pablik pryznany «ekstremisckim», Vadzim nie viedaŭ. Mužčyna taksama patłumačyŭ, što prosta chacieŭ «pakazać ludziam, kolki ŭ nas źjaviłasia vajskovaj techniki». Taksama Vadzim adznačyŭ, što kali b viedaŭ, što zdymka techniki zjaŭlajecca złačynstvam — to nikoli hetaha nie rabiŭ by.
Sudździa Caruk pastanaviŭ pakarać Vadzima Baranava pazbaŭleńniem voli ŭ kałonii va ŭmovach uzmocnienaha režymu terminam na try hady, a telefon, z dapamohaj jakoha «ažyćciaŭlałasia złačynstva», kanfiskavać.
Vadzima Baranava zatrymali paśla viartańnia z Polščy. U milicyi jaho źbili, sapsavali dakumienty i kanfiskavali mabilny telefon.
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?
Kamientary