Biełaruskija vajskoŭcy prajšli padrychtoŭku pa śpiecyjalnym prymianieńni šturmavikoŭ Su-25
Biełaruskija vajskovyja lotčyki i inžyniery naziemnaj słužby prajšli dapadrychtoŭku prymianieńnia na šturmavikach Su-25 śpiecyjalnych bojeprypasaŭ. Pra heta paviedamlaje pres-słužba Ministerstva abarony RB.
14 krasavika vajskovaje viedamstva Biełarusi paviedamiła, što lotny i inžynierna-techničny skład vajenna-pavietranych sił i vojskaŭ supraćpavietranaj abarony Biełarusi zaviaršyli dadatkovuju padrychtoŭku pa prahramie ekspłuatacyi i bajavoha vykarystańnia šturmavikoŭ Su-25.
«Padrychtoŭka ŭklučała jak tearetyčny kurs, tak i praktyčnyja zaniatki pad kiraŭnictvam vopytnych rasijskich instruktaraŭ, što dazvoliła nie tolki palepšyć praktyčnyja navyki lotnaha składu, ale i asvoić novyja sposaby prymianieńnia sučasnych avijacyjnych srodkaŭ paražeńnia, u tym liku i śpiecyjalnych bojeprypasaŭ», — havorycca ŭ paviedamleńni.
Paviedamlajecca taksama, što vajskoŭcy asvoili prahramu padrychtoŭki «ŭ poŭnym abjomie», a atrymanyja viedy i ŭmieńni «pasłužać zabieśpiačeńniu vajennaj biaśpieki Sajuznaj dziaržavy».
Admietna, što na raźmieščanym u telehram-kanale Minabarony videa pra prahramu dapadrychtoŭki raskazvaje čałaviek u kaściumie vajskovaha piłota, imia jakoha nie nazyvajecca, a akulary na lotnym šlemie chavajuć jaho tvar.
Kamientary