U polskich Tatrach zahinuŭ 22-hadovy chłopiec ź Biełarusi
U polskich Tatrach znajšli miortvym maładoha chłopca ź Biełarusi Źmitra Kraŭcova. Jon pajšoŭ u hory ŭ paniadziełak, 3 lipienia. Tatranskaja vałanciorskaja słužba abviaščała pra pošuk jaho.
22-hadovaha Źmitra Kraŭcova z aŭtorka šukali ratavalniki.
Tady ž u miascovaj hornaj supolnaści karystalniki skardzilisia na «śmiećcie», znojdzienaje kala adnoj z alpinisckich tras u skałach Tatr: zaplečnik, dźvie pary mužčynskaha abutku, viaroŭka, kiepka i inšyja asabistyja rečy.
Daśviedčanyja turysty adznačyli, što heta nie zvyčajnaje kinutaje śmiećcie, a niečy zaplečnik, jaki rastrybušyli ptuški. U kamientarach da publikacyi pra pošuk biełarusa karystalniki zhadali pra hety vypadak i vykazali aściarohi, što heta mahli być rečy Kraŭcova.
Bližej da poŭdnia Źmitra znajšli miortvym, jak paviedamiła 24tp.pl. Ratavalniki z dapamohaj viertalota pieravieźli cieła chłopca da balnicy ŭ Zakapane.
Jak paviedamlaje PAP, Źmicier pakinuŭ mašynu na parkinhu na Łysaj palanie. Pa słovach jaho znajomych, jon adpraviŭsia ŭ hory adzin.
Kali chłopiec nie viarnuŭsia, jaho znajomaja zabiła tryvohu. U aŭtorak uviečary ratavalniki pačali šukać biełarusa z dapamohaj dronaŭ. Siońnia ranicaj pačalisia maštabnyja pošuki ź viertalotam.
Źmicier Kraŭcoŭ spyniŭsia ŭ Krakavie. Padobna, jon nie tak daŭno pierajechaŭ u Polšču, jak źviarnuła ŭvahu «Lusterka». Tydzień tamu, 27 červienia, Źmicier raźmiaściŭ u miascovaj hrupie dopis pra toje, što šukaje pracu ŭ śfiery hastranomii ci ŭ kłubie, hatovy pracavać u luby čas sutak i vychadnyja, maje dośvied pracy aficyjantam i mieniedžaram, ale vałodaje polskaj pakul na samym pačatkovym uzroŭni.
Kamientary