«Adčuvajem siabie jak u mietro!» U što ŭvasobiłasia anansavanaje ŭpryhažeńnie kałon unutry Kamaroŭskaha rynku
Budynak Kamaroŭskaha rynku stali «ŭpryhožvać» — fejśliftynh adnaho z najvažniejšych miescaŭ Minska anansavaŭ dyrektar Kamaroŭki ŭ kancy maja. CityDog.io schadziŭ pahladzieć na pryhažość — i trochi ździviŭsia.
Pra jakuju pryhažość havorka?
U kancy maja 2023 hoda dyrektar Kamaroŭki Mikałaj Chmialnicki raskazaŭ žurnalistam, što da kanca lipienia 16 kałon krytaha rynku ŭpryhožać dekaratyŭnyja paneli z «siužetami narodnaj kultury i arnamientam». A pierad uvachodam u budynak rynku pastaviać novyja lichtary.
Čynoŭnik nie ŭdakładniaŭ, jakoha rodu siužety i arnamient buduć u budynku, ale, miarkujučy pa praktycy apošnich dziesiacihodździaŭ, možna było vykazać zdahadku, što na kałonach raźmieściać fota ščaślivych fiermieraŭ abo kałhaśnikaŭ z abaviazkovymi čyrvona-zialonymi elemientami ŭ afarmleńni. I ŭsio heta budzie abramlacca ŭzoram arnamientu ź dziaržściaha. Taki pryjom dziarždyzajnierami pravierany hadami — i, što samaje važnaje, jon ideałahična vyvierany.
Ale afarmlalniki Kamaroŭki ździvili, zdajecca, usich.
Kałony na rynku ŭpryhožanyja hetak ža sama, jak kałony na stancyi mietro «Płošča Jakuba Kołasa».
«Adčuvajem siabie jak u mietro!» — śmiajucca pradavački Kamaroŭki, kali chtości z vypadkovych pakupnikoŭ cikavicca, što naohuł adbyvajecca.
Z 16-ci kałon 10 užo ababita novaj «pryhažościu» — heta kopii dekaratyŭnych kieramičnych plit, jakimi ablicavanaja stancyja mietro «Płošča Jakuba Kołasa».
Čamu abrany mienavita taki dekaratyŭny chod — pytańnie adkrytaje: z adnaho boku, heta budzie vidavočna lepš, čym tyja ž čyrvona-zialonyja partrety pracoŭnych vioski.
Ź inšaha boku, ci dumaŭ kalektyŭ aŭtaraŭ pano ŭ mietro ŭ składzie Albierta Zienzina, Michaiła Pirahova, Juryja Bahuševiča, Hienadzia Žaryna, Lva Tałbuzina i Uładzimira Čuryły, što ich pracu (vidavočnyja aluzii na paeziju i prozu Jakuba Kołasa) vyrvuć z kantekstu (kali pryhledziecca, to stancyja adsyłaje da sialanskaj chaty) i pieraniasuć u zusim inšuju architekturnuju prastoru (vielizarny kupał, na fonie jakoha lohka zhubiacca lubyja nievialikija dyzajn-elemienty)?
I zrobiać heta tak tanna i siardzita — choć i na adzin uzrovień estetyčniej, čym usiudyisny sajdynh, jakim na Kamaroŭcy ababita ŭsio, što tolki možna.
Darečy, voś jakimi pano (miarkujučy pa ŭsim, jany śviacilisia) upryhožvali kałony Kamaroŭki ŭ časy BSSR.
A voś jak vyhladajuć novyja lichtary i łavački na ŭvachodzie na Kamaroŭku.
Kamientary
Na łavačkach možna puskať ich pa kruhu👍
Styl - ahratreš!