U Minsku pradajuć kolišniuju prybiralniu, pra jakuju ŭžo i zabylisia
Cikavy łot źjaviŭsia na aŭkcyjonnaj placoŭcy «Biełrealizacyja»: u Minsku vystavili na tarhi staruju hramadskuju prybiralniu ŭ samym centry horada. Pabudova znachodzicca pobač ź vieładarožkaj za parkam Horkaha, ale daŭno nie funkcyjanuje, zaŭvažyŭ Realt.by.
Vystaŭleny na aŭkcyjon kapitalny budynak raźmiaščajecca na vulicy Pulichava, 4 — prosta nasuprać Śvisłačy. Z usich bakoŭ nievysokuju pabudovu, nakrytuju achoŭnaj sietkaj, akružaje zialony płot. Zakansiervavany budynak, jak i hrafici na jaho aharodžy, daŭno stali častkaj haradskoha piejzažu.
Płošča byłoj hramadskaj prybiralni składaje 59 kvadrataŭ. Pabudova mieścicca na ziamielnym učastku płoščaj 0,0278 ha (u vodaachoŭnaj zonie). Za niekalki mietraŭ ad budynka znachodzicca hałoŭnaja minskaja vieładarožka.
Hramadskaja prybiralnia była pabudavanaja tut jašče ŭ 1966 hodzie. Ale da nulavych abjekt prykmietna sastareŭ i byŭ zakryty. U 2010 hodzie ŭłaśnikam budynka stała pryvatnaja kampanija «Absalutinviestbud», jakaja mieła namier zrabić rekanstrukcyju budynka. Budynak abharadzili, ale zaviaršyć raboty nie ŭdałosia.
Ciapier kolišniaja hramadskaja prybiralnia pradajecca. Pačatkovaja cana kapitalnaha budynka składaje 250 tysiač rubloŭ (78 tysiač dalaraŭ). Tarhi projduć na elektronnaj handlovaj placoŭcy beltorgi.by 28 listapada. Za arendu ŭčastka novamu ŭłaśniku nieabchodna budzie płacić krychu bolš za 2400 rubloŭ.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury6
Kamientary