Rasijskija naftaviki adčuvajuć usio bolšyja prablemy z pastaŭkami ŭ Indyju, jakaja stała druhim najbujniejšym pakupnikom nafty ŭ Rasii paśla jaje ŭvarvańnia va Ukrainu, naraściŭšy impart bolš čym u 30 razoŭ. Jak paviedamlaje Reuters, pryvatny indyjski NPZ Reliance Industries — apieratar najbujniejšaha ŭ śviecie kompleksu pa pierapracoŭcy nafty — admaŭlajecca prymać syravinu, jakuju dastaŭlajuć tankiery dziaržaŭnaha «Saŭkamfłotu».
Paśla taho, jak rasijskaja kampanija trapiła pad amierykanskija sankcyi, Reliance patrabuje, kab nafta nie dastaŭlałasia jaje sudnami. Inšyja indyjskija NPZ taksama płanujuć admovicca ad vykarystańnia sudnaŭ, jakija naležać «Saŭkamfłotu», paviedamili Reuters try krynicy va ŭradzie Indyi i ŭ naftapierapracoŭčaj halinie.
Pa słovach adnaho z surazmoŭcaŭ ahienctva, rašeńnie ab zachodzie sudoŭ «Saŭkamfłotu» i inšych padsankcyjnych tankieraŭ u indyjskija party buduć prymać ułady.
«My addajem pieravahu tamu, kab našyja NPZ nie prymali naftu na sudnach, jakija trapili pad sankcyi, z-za našych palityčnych i kamiercyjnych intaresaŭ, a taksama sankcyj ZŠA», — skazała adna z krynic va ŭradzie Indyi.
U vyniku pastaŭki rasijskaj nafty ŭ Indyju, jakija ŭžo źmienšylisia bolš čym na tracinu ŭ kancy 2023 hoda, mohuć źmienšycca jašče bolš: NPZ imknucca paźbiehnuć luboj niehatyŭnaj reakcyi z boku Vašynhtona i «prajaŭlajuć asablivuju aściarožnaść», patłumačyła krynica Reuters.
Indyja, jakaja nie dałučyłasia da sankcyj letam 2023 hoda, zakuplała 2,15 młn barelaŭ rasijskaj nafty štodnia — kala pałovy ŭsiaho marskoha naftavaha ekspartu z Rasii. Da studzienia pastaŭki źmienšylisia da 1,5 młn barelaŭ za dzień paśla taho, jak ZŠA ŭnieśli ŭ sankcyjnyja śpisy dziasiatki tankieraŭ «cieniavoha fłotu» Kramla, a banki «družalubnych» krain pačali błakavać płaciažy.
Sproby «Rasnafty» zaklučyć doŭhaterminovyja kantrakty ź dziaržaŭnymi indyjskimi NPZ pravalilisia. Paśla pieramoŭ Bharat Petroleum i Hindustan Petroleum, jakija doŭžylisia amal miesiac, pryniali pastanovu nie brać na siabie žorstkich abaviazkaŭ u zakupkach u najbujniejšaj naftavaj kampanii Rasii ŭ hetym finansavym hodzie.
Rasijskuju naftu Indyja zamianiaje na saudaŭskuju: u lutym pastaŭki z Saudaŭskaj Aravii na indyjski rynak vyraśli na 22%, a najbujniejšaja pryvatnaja naftapierapracoŭčaja kampanija, Reliance Industries, nabyła maksimalny abjom z traŭnia 2020 hoda.
Kamientary