Razborki na haicianskich kostkach

Trahiedyja Haici, jak lubaja takaja padzieja, stała łakmusavaj papierkaj dla cełych krain i asobnych ludziej. Piša Volha Žarnasiek.

Haici nazyvajuć samym nieščaślivym miescam na Ziamli. Tam pracujuć sotni dabračynnych arhanizacyj, tudy pieraličajucca miljardy dalaraŭ u hod, ale situacyja nie palapšajecca. Kraina zahrazła ŭ bandytyźmie i karupcyi. Asnoŭnaja zadača mižnarodnych misij na Haici — nie dapuścić krovapralićcia padčas dzialby humanitarnaj dapamohi.

I tym nie mienš, heta tyja rečy, pra jakija varta zabycca, kali pad ruinami lažać dziasiatki tysiač ciełaŭ. Paśla taho, jak adbylisia trahičnyja padziei ŭ Haici, znajšoŭsia šerah ludziej, jakija pačali šukać vinavatych u tym, što zdaryłasia.

Lubimica mnohich prahresiŭnych rasijanaŭ žurnalistka Julija Łatynina napisała pra situacyju ŭ Haici artykuł «Novaja Palestyna».

Užo ŭ pieršym abzacy prahučała cyničnaje paraŭnańnie ‑«žycharoŭ Haici vielmi škada, jak škada siamihadovaha cyhanionka, što siadzić ŭ padziemnym pierachodzie z prahnutaj rukoj». Dalej — šmat litar pra toje, jak haicianie ekspłuatujuć svajo niezajzdrosnaje stanovišča i jakuju rolu va ŭsioj hetaj situacyi adyhrali Francyja i ZŠA. Pad artykułam try sotni kamientaroŭ, mnohija ź ich pra toje, što «nie dam ni kapiejki hetym paprašajkam».

Patryjarch Kirył nazvaŭ ziemlatrus «Božaj karaj» za «stratu maralnaha abličča».

Trapna hetuju situacyju abaznačyŭ papularny rasijski žurnalist Viktar Šenderovič: «…patryjarch, jaki nosić na zapiaści cikajučuju cacku ź biełaha zołata za tryccać tysiač jeŭra, užo daŭno ŭziaŭ na siabie funkcyju Božaha miedyuma». A vieniesuelski siabar Biełarusi Uha Čaves nazvaŭ inšuju pryčynu taho, što adbyłosia na Haici. Pavodle jahonaha mierkavańnia, ziemlatrus — «vynik vyprabavańniaŭ, praviedzienych Vajenna‑marskim fłotam ZŠA».

Znajšlisia i tyja,

chto pačaŭ ličyć hrošy (viadoma, kłapociačysia vyklučna pra haician) i vinavacić krainy ŭ niedastatkovaj dapamozie.

Italjanskaja hazieta Il Giornale prajšłasia pa musulmanskich krainach, nadrukavaŭšy artykuł «Voś vam isłamskaja salidarnaść: Aravija nie dała ni kapiejki na Haici». Uzhadaŭšy, jak saudaŭskaja ruka, skupaja dla haician, praciahnuła miljard dalaraŭ paśla vajny Iraku. U lubym razie, zdareńnie na Haici stała nahodaj dla taho, kab pakapacca ŭ brudnaj bialiźnie mnohich krain. Pad abstreł krytykaŭ patrapili jak ZŠA, tak i musulmanski śviet dy Jeŭropa.

Biełaruś taksama nie mahła nie adznačycca.

Rasijski błohier tiradorrus padrychtavaŭ mapu, na jakoj abaznačyŭ zialonym koleram krainy, jakija akazali humanitarnuju dapamohu Haici, šerym — tych, chto hetaha nie zrabiŭ. Adzina šeraj plamaj u centry Jeŭropy akazałsia Biełaruś. U srodkach masavaj infarmacyi šyroka tyražavałasia vykazvańnie ministra pa nadzvyčajnych situacyjach Enviera Baryjeva pra toje, što

ministerstva nie bačyć «nadzionnaj nieabchodnaści» dapamahać Haici.

I heta ŭ čas, kali hiensiek AAN Pan Hi Mun zaklikaŭ suśvietnuju supolnaść sabrać hrošy, kali Jeŭrasajuz harantavaŭ dapamohu ŭ pamiery bolš za paŭmiljarda dalaraŭ; kali navat biednyja afrykanskija krainy pieraličvajuć Haici hrošy.

Pakul ułada zajmajecca naftavymi vojnami, jaje funkcyi, u jaki ŭžo raz, pierajmaje hramadzianskaja supolnaść.

U niadzielu ŭ minskaj parafii Śviatoha Jana Chryściciela, ładziłasia dabračynnaja akcyja pa zboru hrošaj haicianskim dzieciam.

Ideja naležała probašču, ksiandzu Iharu Łašuku. Jon zaznačyŭ, što napiaredadni jamu telefanavała šmat ludziej, jakija pytalisia, kudy možna pieraličyć srodki, kab dapamahčy achviaram pryrodnych kataklizmaŭ. Tady ksiondz vyrašyŭ arhanizavać dabračynnuju akcyju. U niadzielu, na praciahu cełaha dnia kožny achvotny moh pačastavacca blinami ź miodam uzamien za achviaravańnie. Płata za pačastunki była advolnaja, ale ŭ skarbonku ludzi časam kłali sumy, roŭnyja niekalkim siarednim zarobkam. Usio adbyvałasia biez pafasu. Nie było šyrokaj ahałoski i farmalnaściaŭ, nie prysutničali dziaržaŭnyja telekanały, nie było čynoŭnikaŭ. Tak vyhladała pieršaja ŭ Biełarusi akcyja pa zboru srodkaŭ achviaram ziemlatrusu ŭ Haici.

Jakoj by ni była raniejšaja historyja haician, nie varta zaraz ładzić razborki na kaściach i šukać pryčynu ziemlatrusu. Usio heta vyhladaje biesčałaviečna, kali zahinuli dziasiatki tysiač ludziej i niekalki miljonaŭ zastalisia bieź pitnoj vady i dachu nad hałavoj. Možna prypadabniacca da patryjarcha i kazać, što haicianie vinavatyja sami, a možna zrabić, jak prosty śviatar i dapamahčy dzieciam Haici. Z nadziejaj na toje, što jany kaliści źmieniać svaju krainu da lepšaha.

• 0
• 0
• 0
• 0
• 0
• 0
• 0
• 0