Chata aktyvistki Aleny Januškoŭskaj ź Viciebskaha rajona pradadziena 30 traŭnia na aŭkcyjonie za 18500 rubloŭ. Startavaja cana była 10700. Alena ličyć, što cana ŭsio roŭna nižejšaja za rynkavuju, piša «Radyjo Racyja». Suma ž zapazyčanaści Aleny Januškoŭskaj składała 1436 rubloŭ.
— Jeździli vielmi šmat ludziej i hladzieli maju chatu. Pra heta mnie paviedamili susiedzi, a zadarma — čamu nie ŭziać? Realnaja cana hetaj chaty našmat bolej. Ja razumieju tak, što heta prybližanyja tych čynoŭnikaŭ. Chata amal u troch kiłamietrach ad horada, maršrutka i aŭtobusy chodziać da horada, pieššu dajści da horada — heta 20 chvilin. Tam ziamli 54 sotki, tam sažałka jość, — kaža Alena.
Suma zapazyčanaści Aleny Januškoŭskaj składaje 1436 rubloŭ 60 kapiejek, ź ich 856 rubloŭ — heta niaspłočanyja štrafy. Astatniaje — padatki, jakija žančyna nie mieła mahčymaści zapłacić z‑za miažy.
Ci možna budzie niejkim čynam atrymać astatnija hrošy za svaju majomaść, Januškoŭskaja nie viedaje. I nie vyklučaje, što hetyja hrošy vykarystajuć jak «prynadu», kab zaachvocić jaje viarnucca z‑za miažy.
U Biełarusi i pieradusim na Viciebščynie žančynu viedajuć jak stvaralnicu šerahu hrup u sacyjalnych sietkach i videakanała «Nastojaŝaja Biełaruś», dzie błohierka jašče z 2018 hoda raspaviadała pra nialohkaje žyćcio viaskoŭcaŭ. U listapadzie 2021 hoda Ministerstva infarmacyi ŭklučyła ŭ Respublikanski śpis ekstremisckich materyjałaŭ niekalki videarolikaŭ, raźmieščanych na hetym YouTube-kanale, u śniežni 2022-ha ŭ hety śpis unieśli hrupu «Nastojaŝaja Biełaruś» u sacyjalnaj sietcy «VKontaktie», u krasaviku 2023-ha — hrupu z takoj samaj nazvaj u «Odnokłaśśnikach», u lutym 2024 hoda — hrupu «Nastojaŝaja Biełaruś» u Facebook.
Alena Januškoŭskaja pakinuła Biełaruś u lutym 2021 hoda. Pryčynaj staŭ cisk za błohierskuju dziejnaść: z 2020 hoda błohierku nieadnarazova karali aryštami i štrafami za jaje strymy z važnych hramadska-palityčnych padziej u Viciebsku i ŭ Minsku. Aryšty davodziłasia adbyvać, niahledziačy na istotnyja prablemy sa zdaroŭjem: žančyna pakutuje na astmu, maje invalidnaść. Cisnuli na błohierku i praz represii ŭ dačynieńni da jaje blizkich: dačku Juliju nieadnarazova štrafavali za ŭdzieł u tak zvanych niesankcyjanavanych akcyjach, sacyjalnyja słužby pahražali adabrać u jaje dźviuch niepaŭnaletnich dačok. Ciapier Julija Ułasienka razam ź dziećmi taksama znachodzicca pa-za miežami Biełarusi.
Ciapier čytajuć
Ci zakryjuć Jeŭropu dla biełarusaŭ? Daradca Cichanoŭskaj raspavioŭ, pra što damoviŭsia ŭ Bierlinie1
Kamientary
Pakul bačyš, luby čytače, tvaju chatu i kanfiskoŭvaćmuć
Nia łunaju ŭ iluzyjach, tam pra niapravilny sacyjalizm i Alenin słušny, ale pacikuju chacia ž