Niahledziačy na žorstki razhon pratestaŭ napiaredadni, hruziny, aburanyja aficyjnaj admovaj uładaŭ ad pracesu jeŭraintehracyi, znoŭ vyjšli na vulicy bujnych haradoŭ.
Sotni dziejnych supracoŭnikaŭ roznych hruzinskich ministerstvaŭ, uklučajučy MZS, Minabarony, Minadukacyi i Miniust, 29 listapada padpisali adkrytyja listy, jakija asudžajuć zamarožvańnie pieramovaŭ ab ustupleńni krainy ŭ JEZ jak niekanstytucyjnaje, paviedamlaje Reuters.
Niekatoryja pryvatnyja ŭniviersitety krainy zajavili, što prypyniajuć navučalny praces na fonie biesparadkaŭ.
A ŭviečary ŭ piatnicu ŭ stalicy Hruzii pačałasia novaja akcyja pratestu kala budynka parłamienta krainy. Tysiačy ludziej vyjšli na mitynh druhi dzień zapar, niahledziačy na žorstki razhon akcyi minułaj nočču i šmatlikija zatrymańni.
Pratestoŭcy pierakryli ruch na praśpiekcie Rustavieli, kudy byli ściahnutyja značnyja siły palicyi. Na płošču da parłamienta ŭ Tbilisi prybyŭ śpiecnaz, da płoščy byli padahnanyja vadamioty.
Hruzinskija ŚMI paviedamlajuć, što śpiecnaz užo ŭžyŭ vadamioty na niekatorych tbiliskich vulicach. Vydańnie Tbilisi life udakładniaje, što za niekalki chvilin da prymianieńnia vadamiotaŭ siłaviki vykarystoŭvali piarcovy sprej.
MUS Hruzii vypuściła pres-reliz, u jakim śćviardžajecca, što «niekatoryja z prysutnych vystupili suprać pravaachoŭnikaŭ i abrazili ich słaviesna, paškodzili aśviatlalnyja lichtary i inšaje abstalavańnie, a taksama padpalili elektrapravodku». «U palicejskich kidajuć nieapaznanyja pradmiety, adzin palicejski paranieny», — śćviardžaje viedamstva.
Akcyja pratestu prachodzić i ŭ Batumi. Hramadzianie pryjšli da meryi horada i pravodziać tam mitynh. Na miescy prysutničaje vialikaja kolkaść palicejskich, jakija pakul nie ŭmiešvalisia ŭ toje, što adbyvajecca.
Stychijnyja pratesty pačalisia ŭ Hruzii 28 listapada. Tysiačy ludziej spantanna sabralisia kala parłamienta ŭviečary paśla taho, jak premjer Irakli Kabachidze abviaściŭ pra admovu ad pačatku pieramoŭ pra ŭstupleńnie Hruzii ŭ Jeŭrapiejski Sajuz. Da 9 viečara pratestoŭcy pierakryli praśpiekt Rustavieli, a paśla zaniali i inšyja prylehłyja vulicy, na jakich znachodziacca słužbovyja ŭvachody ŭ parłamient.
Paśla apoŭnačy suprać demanstrantaŭ stali vykarystoŭvać śpiecyjalnyja srodki, u MUS zajavili, što «akcyja vyjšła za miežy mirnych schodaŭ». Da 2 hadzin nočy pačaŭsia razhrom pratestoŭcaŭ i masavyja zatrymańni. Jak adznačyŭ narodny abaronca Hruzii Levan Iasieliani, demanstracyja nasiła mirny charaktar, a dziejańni palicyi parušyli svabodu schodaŭ. U ŚMI źjavilisia kadry šmatlikich faktaŭ źbićcia ŭdzielnikaŭ akcyi, u tym liku žurnalistaŭ i palitykaŭ.
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club4
Kamientary