Navukoŭcy dali jašče adno tłumačeńnie zahadkavamu vymirańniu nieandertalcaŭ
Raniejšyja hipotezy havaryli pra toje, što nieandertalcy albo całkam asimilavalisia siarod našych prodkaŭ — Homo sapiens — albo byli imi vyniščanyja. Źjaviłasia i inšaja viersija.
Nieandertalcy źnikli dziasiatki tysiač hadoŭ tamu, pakinuŭšy prodkaŭ sučasnych ludziej (Homo sapiens) adzinym vidam haminidaŭ na płaniecie. Niahledziačy na šmatlikija daśledavańni, dakładnaja pryčyna vymirańnia nieandertalcaŭ dahetul zastajecca zahadkaj.
Kamanda paleaantrapołahaŭ i hienietykaŭ ź niekalkich dziaržaŭnych i pryvatnych łabaratoryj dy navučalnych ustanoŭ Francyi vyjaviła mahčymuju pryčynu, jakaja mahła spryjać zaniapadu nieandertalcaŭ. Namiok byŭ znojdzieny ŭ kryvi staražytnych ludziej, piša bujny navukovy partał Phys.org.
Francuzskija navukoŭcy vyrašyli vyvučyć hieny pradstaŭnikoŭ dvuch rodnasnych čałavieku vidaŭ — nieandertalcaŭ i dzianisaŭcaŭ, jakija žyli ŭ Jeŭrazii ŭ pieryjad ad 300 000 da 40 000 hadoŭ tamu —, a zatym paraŭnać ich z hiennym materyjałam Homo sapiens. U pryvatnaści, daśledčykaŭ cikavili hieny, adkaznyja za vypracoŭku cukraŭ i białkoŭ na pavierchni erytracytaŭ (kletak kryvi).
Adnym z takich białkoŭ źjaŭlajecca rezus-faktar, typ i najaŭnaść jakoha ŭ kryvi vyznačajecca sistemaj Rh, jakaja istotna ŭpłyvaje na imunitet čałavieka. Daśledčyki vyjavili, što ŭ nieandertalcaŭ byŭ redki varyjant rezus-faktara pad nazvaj RhD, jaki ŭ sučasnych ludziej sustrakajecca nadzvyčaj redka. Pry hetym RhD nie byŭ sumiaščalny ź inšymi rezus-faktarami, charakternymi dla staražytnych Homo sapiens i dzianisaŭcaŭ.
Takaja niesumiaščalnaść rezus-faktaraŭ u ludziej, pavodle daśledavańnia, zvyčajna pryvodzić da redkich chvarobaŭ kryvi ŭ ich naščadkaŭ. Heta značyć, što kali mužčyna vidu Homo sapiens abo dzianisaviec ustupali ŭ suviaź z žančynaj-nieandertałkaj, to ŭ ich dziaciej z vysokaj vierahodnaściu mahli ŭźniknuć surjoznyja prablemy z raźvićciom, biaspłodździe, albo jany mahli hinuć jašče va ŭłońni maci, što mahło spravakavać masavaje źnižeńnie papulacyi nieandertalcaŭ u vyniku mižvidavaha skryžavańnia, tłumačać navukoŭcy.
Pa ich viersii, u pracesie asimilavańnia z dvuma inšymi vidami nieandertalcy pastupova vymirali naturalnym šlacham, a nie tamu, što prajhrali intelektualnuju kankurencyju abo byli fizična źniščanyja.
Kamientary
Padumajcie, čamu 250 tys. hadoŭ zapar ichny radavod praciahvaŭsia biez prablem, z usimi klimatyčnymi vybrykami, dy inšymi pryrodnymi siurpryzami, ale raptam
źvioŭsia, i heta čamuści supała z pajaŭleńjenm pobač mienavita sapijensaŭ ? Ni šablazubyja tyhry, ni mamanty, ni vaŭki, ni chvaroby nie zaminali, poki nie pryjšli sapijensy... Voś vam i adkaz na pytańnie, chto vinavaty...
...
a što - žančyny-nieandertałki byli pryhažejšyja za dzianisaŭskich? a dzie fota?