Pryčynaj enierhietyčnaha kałapsu ŭ Mazyry staŭ bieśpiłotnik, jaki zalacieŭ u Biełaruś
Jak stała viadoma «Fłahštoku», adklučeńnie ciepłazabieśpiačeńnia ŭ Mazyry 27—28 lutaha było źviazana z padzieńniem bieśpiłotnika. Pra incydent paviedamiŭ žychar rajona, znajomy z abstavinami zdareńnia.
Unačy 27 lutaha praz padzieńnie drona była paškodžana adna z vysakavoltnych linij miascovaj CEC (znachodzicca na poŭdni Mazyra kala MNPZ). Z-za aŭtamatyčnaj sistemy abarony, jakaja niekarektna spracavała, avaryjna adklučylisia i susiednija vysakavoltnyja linii, całkam abiastočyŭšy CEC.
Paśla niekalkich sprob, stancyja była pierazapuščana, adnak uźnikła novaja biada — pusk ciepłanośbita pryvioŭ da hidraŭdaru ŭ sistemie trubapravodaŭ. U vyniku ŭ niekalkich miescach byŭ paškodžany mahistralny trubapravod dyjamietram 700 milimietraŭ.
Zabieśpiačeńnie statysiačnaha Mazyra haračaj vadoj u nieabchodnym abjomie stała niemahčymym.
Pa aficyjnych paviedamleńniach, dla likvidacyi avaryi zapatrabavałasia praca avaryjnych bryhad kolkaściu 20 čałaviek. Dla ich kaardynacyi byŭ stvorany štab, raboty kantralavali Minenierha i čynoŭniki Homielskaha abłvykankama. Zvaračnyja raboty byli zavieršany tolki da 01:10 28 lutaha, da ranicy ŭ spažyŭcoŭ stała adnaŭlacca tempieratura batarej.
Pralot bieśpiłotnika ŭ Mazyrskim rajonie zafiksavaŭ ukrainski manitorynhavy kanał «Rynda Manitoryt»: śpiecyjalist kanała paviedamiŭ «Fłahštoku» ab źjaŭleńni BpŁA ŭ pavietranaj prastory Biełarusi niedaloka ad Mazyra 27 lutaha ŭ 04:01
U hety čas Ukraina (u tym liku i paŭnočnyja vobłaści: Čarnihaŭskaja, Kijeŭskaja, Žytomirskaja, Vińnickaja) znachodziłasia pad masiravanym napadam rasijskich bieśpiłotnikaŭ. U susiedniaj Žytomirskaj vobłaści Ukrainy pahroza ataki BPŁA zachoŭvałasia z 01:45 da 04:52 pa minskim časie.
Hety incydent staŭ pieršym vieryfikavanym vypadkam, kali z-za BPŁA byŭ naniesieny ŭron enierhietyčnaj sistemie Biełarusi.
Dziejučyja ŭłady paličyli za lepšaje schavać infarmacyju ab pryčynach maštabnaj avaryi.
Charakterna, što ŭ tuju ž noč 27 lutaha nieviadomy bieśpiłotnik upaŭ na pabudovu ŭ Homielskim rajonie.
Kamientary
A ŭpaści moža. Bo bieśpiłotnik padaje zaŭsiody raptoŭna i nieviadoma dzie.
Heta nie padnačalenych za łajki i kamientary ŭ internecie hubaziku zdavać. Tut nijak nie prakantraluješ.