Ministarka ekanomiki Ukrainy Julija Śvirydzienka paviedamiła pra padpisańnie pahadnieńnia ab pryrodnych resursach z ZŠA. Čynoŭnica adznačyła, što ŭ vyniku atrymałasia sfarmavać takuju viersiju dakumienta, jakaja praduhledžvaje ŭzajemavyhadnyja ŭmovy dla abiedźviuch dziaržaŭ. Ministerstva finansaŭ ZŠA taksama paćvierdziła padpisańnie damovy.
Julija Śvirydzienka pieraličyła asnoŭnyja pałažeńni padpisanaha pahadnieńnia:
- Usie resursy zastajucca va ŭkrainskaj ułasnaści — heta zamacavana dakumientam.
- Inviestycyjny fond stvarajecca na ŭmovach 50/50. Kijeŭ budzie kiravać fondam sumiesna z Vašynhtonam, abodva baki roŭnyja.
- Damoŭlenaści nie źmianiajuć pracesy pryvatyzacyi abo kiravańnia dziaržkampanijami. Ukrainskija «Ukrnafta» i «Enierhaatam» zastajucca va ŭłasnaści dziaržavy.
- Pahadnieńnie nie ŭtrymlivaje zhadak pra jakich-niebudź daŭhavyja abaviazacielstvy Ukrainy pierad ZŠA i nie mianiaje jaje kurs na intehracyju ŭ Jeŭrasajuz. Dakumient nie supiarečyć mižnarodnym abaviazacielstvam Kijeva.
- Fond budzie napaŭniacca vyklučna z novych licenzij, dachodami ad novych prajektaŭ u halinie krytyčnych materyjałaŭ, nafty i hazu.
- Dla pracy fondu praduhledžana tolki ŭniasieńnie źmienaŭ va ŭkrainski Biudžetny kodeks. Samo ž pahadnieńnie pavinna ratyfikavać Viarchoŭnaja Rada.
- Złučanyja Štaty dapamohuć Ukrainie pryciahvać inviestycyi, technałohii i inavacyi praz ahienctva DFC (Development Finance Corporation).
- Dachody i ŭznosy fondu nie abkładajucca padatkami ni ŭ ZŠA, ni va Ukrainie.
Kijeŭ raźličvaje, što pieršyja 10 hadoŭ dachody i pastupleńni fondu nie buduć raźmiarkoŭvać, a buduć tolki inviestavać va Ukrainu. Hetyja ŭmovy abmiarkujuć dadatkova.
U svaju čarhu, ministr finansaŭ ZŠA Skot Biesient padkreślivaje:
«Heta pahadnieńnie vyrazna daje zrazumieć Rasii, što administracyja Trampa prychilnaja mirnamu pracesu, u centry jakoha — svabodnaja, suvierennaja i kvitniejučaja Ukraina ŭ doŭhaterminovaj pierśpiektyvie».
Jon adznačyŭ, što krainam i asobam, jakija finansavali rasijski VPK ci rabili dla jaho pastaŭki, budzie zabaroniena atrymlivać vyhadu ad spravy adnaŭleńnia Ukrainy.
«Pahadnieńnie ŭmacoŭvaje stratehičnaje partniorstva pamiž bakami dla doŭhaterminovaha adnaŭleńnia i madernizacyi Ukrainy ŭ adkaz na maštabnyja razbureńni, vyklikanyja poŭnamaštabnym uvarvańniem Rasii», — skazana ŭ dakumiencie.
Pahadnieńnie ab nietrach pamiž Ukrainaj i ZŠA mohuć padpisać na praciahu sutak
Stała viadoma, pra što mahli razmaŭlać Zialenski i Tramp padčas sustrečy ŭ Vatykanie
Tramp znoŭ zaklikaje Pucina «spynić stralbu» i zaklučyć «ździełku»
Tramp zapatrabavaŭ ad Zialenskaha nieadkładna padpisać pahadnieńnie ab nietrach
Ciapier čytajuć
U Francyi ad śpioki zahinuŭ dalnabojščyk z Dokšycaŭ10
Kamientary