«Roŭna ŭ toj momant». Irłandyja rasśleduje palot nieviadomych dronaŭ kala maršrutu samalota Zialenskaha
Urad Irłandyi atrymaŭ infarmacyju, što ŭ niebie nad krainaj źjavilisia nieviadomyja drony — i heta adbyłosia prykładna ŭ toj ža čas, kali ŭ Dublinie pavinien byŭ pryziamlicca samalot Uładzimira Zialenskaha. Prezident Ukrainy naviedaŭ Irłandyju ź dziaržaŭnym vizitam na pačatku hetaha tydnia, paviedamlaje Bi-bi-si.
Krynicy ŭ irłandskim uradzie paćvierdzili, što taki incydent sapraŭdy mieŭ miesca, ale ŭzbrojenyja siły Irłandyi admovilisia kamientavać infarmacyju, jakaja napačatku źjaviłasia ŭ ŚMI.
Danyja ab dronach taksama paćvierdziŭ daradca Zialenskaha Dźmitryj Litvin. «Za biaśpieku adkazvaje prymajučy bok, — paviedamiŭ jon ukrainskim žurnalistam. — Pa ich danych, sapraŭdy byli takija drony, ale heta nie paŭpłyvała na vizit i nie prymusiła niešta mianiać u vizicie».
«Roŭna ŭ toj momant»
Pieršym pra źjaŭleńnie dronaŭ u niebie kala Dublina paviedamiła irłandskaje vydańnie Journal.
Pavodle jaho źviestak, u paniadziełak uviečary, kali samalot Zialenskaha pavinien byŭ padlatać da Dublina, čatyry nieviadomyja drony pralacieli ŭ kirunku mierkavanaha maršrutu prezidenckaha borta.
«Samalot pryziamliŭsia krychu raniej, čym było naležyć pa raskładzie, usiaho za niekalki momantaŭ da incydentu, jaki adbyŭsia kala 23:00. Drony dasiahnuli miesca, dzie pavinien byŭ znachodzicca samalot Zialenskaha, roŭna ŭ toj momant, kali jaho pralot tam byŭ zapłanavany», — skazana ŭ publikacyi.
Aŭtary Journal paviedamlajuć, što havorka idzie pra čatyry drony, jakija jany apisvajuć jak «aparaty vajennaha ŭzoru». U publikacyi taksama skazana, što heta byli kvadrakoptary.
Miž tym, hazieta Irish Times piša sa spasyłkaj na krynicy, što irłandski vajenny karabiel LÉ William Butler Yeats vyjaviŭ piać dronaŭ, «jakija lacieli i kala maršrutu samalota Zialenskaha».
«Ich źjaŭleńnie vyklikała maštabnuju tryvohu słužbaŭ biaśpieki na fonie aściaroh, što heta była sproba ŭmiašacca ŭ maršrut pieramiaščeńnia samalota», — piša hazieta.
U momant pryziamleńnia prezidenckaha borta nad Dublinam była ŭviedziena biespalotnaja zona.
Miarkujučy pa dadzienych presy, ułady pakul dakładna nie viedajuć pra pachodžańnie dronaŭ, pra toje, adkul mienavita jany ŭźlacieli, i dzie jany znachodziacca ciapier.
Spačatku aeraport, potym — vajenny karabiel
«Radyus ich dziejańnia i čas, jaki jany zdolnyja pravieści ŭ pavietry, kažuć pra toje, što heta byli prasunutyja drony i imi kiravali daśviedčanyja piłoty», — piša Irish Times sa spasyłkaj na svaje krynicy.
Jak paviedamlaje Journal, drony mahli ŭźlacieć z rajona, raźmieščanaha na paŭnočny ŭschod ad Dublina, mahčyma, kala paŭvostrava Choŭt-Ched, na paŭnočnym baku Dublinskaha zaliva. Ułady razhladajuć viersii ab zapusku ź ziamli, albo z pakul nieidentyfikavanaha sudna.
Drony lacieli z uklučanym śviatłom, i, miarkujučy pa ŭsim, «jany chacieli, kab ich zaŭvažyli», paviedamili krynicy Irish Times.
Pralacieŭšy kala mierkavanaha maršrutu samalota Zialenskaha, drony zatym nakiravalisia da irłandskaha vajennaha karabla, jaki byŭ nakiravany ŭ Irłandskaje mora ŭ suviazi ź vizitam ukrainskaha prezidenta, pišuć miascovyja vydańni.
Journal taksama śćviardžaje, što irłandskija vajennyja pryniali rašeńnie nie źbivać drony, pakolki ŭ ich nie było efiektyŭnaj aparatury dla baraćby ź imi. U publikacyi skazana, što na vajennych karablach nie było nijakich srodkaŭ supraćpavietranaj abarony, akramia kulamiotaŭ, a radyusa dziejańnia palicejskich pryład suprać dronaŭ nie chapiła.
U apošnija miesiacy ŭłady adrazu niekalkich jeŭrapiejskich krain paviedamlajuć pra źjaŭleńnie dronaŭ nad svaimi aeraportami i vajennymi bazami. Apošni taki incydent adbyŭsia ŭ Niderłandach 22 listapada, kali nieviadomyja bieśpiłotniki byli vyjaŭleny nad vajennaj bazaj Volkiel niedaloka ad miažy z Hiermanijaj.
U vieraśni rasijskija drony typu «šachied» zalacieli na terytoryju Polščy padčas ataki pa celach va Ukrainie, bieśpiłotniki taksama vyjaŭlali ŭ mnohich krainach, a taksama ŭ Bielhii, Hiermanii i Litvie.
Niekatoryja jeŭrapiejskija palityki ličać, što za hetymi dziejańniami staić Rasija, adnak Maskva paśladoŭna admaŭlaje svoj udzieł u palotach dronaŭ.
Ciapier čytajuć
Voś chto toj chłopiec, jaki pajechaŭ na prapołku bulby i staŭ hierojem sacsietak4
Kamientary