U vioscy pad Maładziečnam u chacie ź dziasiatkam sabak znajšli miortvaha mužčynu
21 śniežnia ŭ vioscy Łasi Maładziečanskaha rajona ŭ chacie, dzie časova ŭtrymlivalisia kala dziesiaci sabak, byŭ znojdzieny miortvym mužčyna, jaki dahladaŭ hetych žyvioł. Jon zajmaŭsia imi na pieryjad pošuku dla sabak novych haspadaroŭ, paviedamlaje Kraj.by.
Pavodle papiaredniaj infarmacyi, z čaćviarha, 18 śniežnia, mužčyna nie vychodziŭ na suviaź ź miascovymi žycharami. Tryvohu padniała ŭładalnica chaty, jakaja dazvoliła jamu časova žyć tam razam z sabakami. Kali mužčyna pierastaŭ vychodzić na vulicu, žančyna zaniepakoiłasia, ale nie zmahła trapić u chatu, bo žyvioły pavodzili siabie ahresiŭna i nie puskali ŭsiaredzinu.
Žančyna vyklikała chutkuju dapamohu, adnak miedyki taksama nie zmahli ŭvajści ŭ chatu. Tady jany źviarnulisia pa dapamohu da MNS, a tyja, u svaju čarhu, źviazalisia z dyrektaram centra vyratavańnia biazdomnych žyvioł «Mara» Dzianisam Burkievičam.
Paśla traplańnia ŭ chatu vyśvietliłasia, što mužčyna sapraŭdy znachodziŭsia tam biez prykmiet žyćcia. Jahony tvar byŭ u kryvi, adnak inšych bačnych cialesnych paškodžańniaŭ znojdziena nie było. Papiarednie miarkujecca, što śmierć nie mieła hvałtoŭnaha charaktaru.
U chacie taksama znachodzilisia kala dziasiatka sabak: dakładnuju kolkaść vyznačyć było składana, bo žyvioły chavalisia. Jašče dvuch sabak znajšli miortvymi. Sa słoŭ viaskoŭcaŭ, mužčyna rehularna vyhulvaŭ žyvioł dvojčy na dzień. U pamiaškańniach nie znajšli śladoŭ užyvańnia ałkaholu.
Śledčy kamitet pravodzić pravierku pa fakcie śmierci mužčyny. Pryčyny jaho hibieli ŭstanaŭlivajucca.
Ciapier čytajuć
Prapahanda rychtuje hramadstva da zahadkavaj «praciahłaj kamandziroŭki» Łukašenki39
Kamientary