Paviedamleńnie pra toje, što Jana Kastrankova zahinuła, źjaviłasia na staroncy pošukavaha atrada «Anioł».
«Kastrankova Jana Jurjeŭna znojdzienaja. Vykazvajem spačuvańni rodnym i blizkim zahinułaj», — piša pošukavy atrad «Anioł».
Raniej Śledčy kamitet paviedamiŭ, što adzieńnie dziaŭčyny, jakuju znajšli siońnia ŭ vadajomie Ślapianskaj vodnaj sistemy, pa źniešnich prykmietach padobnaje da taho, u jakoje była apranutaja źnikłaja niezadoŭha da taho Jana Kastrankova.
Suviaź ź dziaŭčynaj źnikła 30 śniežnia 2025 hoda. Jana žyła ŭ «Majaku Minska».
Maci Jany pisała ŭ sacsietkach, što apošni raz telefon jaje dački byŭ zafiksavany ŭ toj dzień u 18:27 pobač z parkam Čaluskincaŭ. Žančyna kazała, što razmaŭlała z dačkoj u dzień źniknieńnia pryblizna ŭ 14:30. Taja kazała, što, imavierna, pryjdzie da baćkoŭ sustrakać Novy hod.
Dziakujučy haradskim kamieram atrymałasia vyśvietlić tolki toje, što ŭ 16:30 Jana zachodziła ŭ «Dana Moł», a paśla sustrakałasia z žančynaj la mietro «Uručča». Taja žančyna była ŭładalnicaj kvatery, jakuju Jana chacieła arandavać, ale pieradumała — la mietro žančyna viarnuła joj zadatak.
12 studzienia ŭ vadajomie Ślapianskaj vodnaj sistemy znajšli cieła dziaŭčyny. U zahinułaj apaznali Janu.
Jak akazałasia, cieła dziaŭčyny znajšli ŭ vadzie prykładna za adzin kiłamietr ad parka Čaluskincaŭ, dzie jaje telefon zafiksavali apošni raz.
21‑hadovaja Jana Kastrankova, miarkujučy pa sacsietkach, pracavała fatohrafkaj. Heta dačka Juryja Kastrankova, dyrektara AAT «Ahra-Laskavičy» (haspadarka ŭvachodzić u strukturu Kiraŭnictva spravami prezidenta). Juryja pryznačyli na pasadu letaś u lutym 2025 hoda. Paru miesiacaŭ tamu jon davaŭ spravazdaču Łukašenku, jaki vyrašyŭ naviedać ahrakompleks va ŭzornym ahraharadku ŭ Pietrykaŭskim rajonie.
Ciapier čytajuć
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak30
Kamientary