U Rasii vydatkavali kala 1 młrd rubloŭ (11 młn jeŭra) ź fiederalnaha biudžetu na raspracoŭku ajčynnych lekaŭ ad impatencyi, ale tak i nie atrymali vyniku. Heta vynikaje z dakładu Padlikovaj pałaty, piša The Moscow Times.
Pavodle źviestak viedamstva, prajekt, jaki vioŭ Navukovy centr bijamiedycynskich technałohij Fiederalnaha miedyka-bijałahičnaha ahienctva, atrymlivaŭ finansavańnie z 2017 da 2025 hoda.
Jon byŭ nakiravany na vyvučeńnie pryrodnych ułaścivaściaŭ muskusu kabarhi — sakretu pachučaj załozy alenia — i stvareńnie novych preparataŭ na jaho asnovie, siarod inšaha, lekaŭ dla karekcyi erektylnaj dysfunkcyi, pavyšeńnia pracazdolnaści, lačeńnia čerapna-mazhavych traŭm dy išemičnaha insultu.
U miežach prajekta mierkavałasia pabudavać hadavalnik dla raźviadzieńnia i ŭtrymańnia kabarhi ŭ Horna-Ałtajsku, a taksama łabaratoryju ŭ Krasnahorskim rajonie Padmaskoŭja.
Pieršapačatkova płanavałasia, što vypusk hatovaj pradukcyi pačniecca ŭ 2020 hodzie, ale terminy pastajanna pieranosilisia.
Tak, hadavalnik uviali ŭ ekspłuatacyju tolki ŭ červieni 2024-ha, a budaŭnictva łabaratoryi, dzie pavinny byli raspracoŭvać leki, dahetul nie zakončyli. Pry hetym preparat «Muskuliŭ» dla lačeńnia impatencyi raspracoŭvaŭsia z vykarystańniem syraviny, zakuplenaj na rynku, a nie atrymanaj u hadavalniku. U svaju čarhu kliničnyja daśledavańni pravodzilisia ŭ pryvatnych miedustanovach zamiest dziaržaŭnych.
U vyniku Navukovy centr bijamiedycynskich technałohij tak i nie stvaryŭ zamkniony cykł vytvorčaści ajčynnych preparataŭ z muskusa kabarhi. A zamiest lekaŭ vypuściŭ BADy.
Ciapier čytajuć
Łukašenka zaklikaŭ žycharoŭ Homielščyny nie chvalavacca z-za ŭltymatumu Zialenskaha adnosna retranślataraŭ69
Kamientary