U ZŠA padrychtavali novyja sankcyi suprać Rasii na vypadak pravału pieramoŭ
Administracyja prezidenta ZŠA Donalda Trampa padrychtavała novyja sankcyi suprać Rasii, ale pakul nie śpiašajecca ich uvieści. Pra heta paviedamili ahienctvu Bloomberg jeŭrapiejskija čynoŭniki, znajomyja ź situacyjaj.
Usie ciapier sočać za mirnymi pieramovami pamiž Rasijaj, ZŠA i Ukrainaj, adnak u Jeŭropie ŭzrastaje skiepsis adnosna ich pośpiechu. Surazmoŭcy adznačyli, što Maskva, nie dasiahnuŭšy vynikaŭ na poli boju, uzmacniła cisk na Kijeŭ i sprabuje prymusić jaho pryniać niavyhadnuju damovu praz masavyja ŭdary pa enierhietyčnaj infrastruktury.
Vašynhton pačaŭ rychtavać novyja sankcyi jašče ŭ śniežni na vypadak, kali mirnyja pieramovy pravalacca. Abmiarkoŭvalisia abmiežavańni dla rasijskaha enierhietyčnaha siektara, a taksama miery suprać tak zvanaha «cieniavoha fłotu» dla pieravozki nafty i suprać trejdaraŭ, jakija spryjajuć prodažu rasijskaha paliva. Ministr finansaŭ ZŠA Skot Biesient abmiarkoŭvaŭ hetyja płany z hrupaj jeŭrapiejskich ambasadaraŭ, adnak kančatkovaje rašeńnie pra sankcyi prymaje prezident.
Za hod na pasadzie Tramp uvioŭ abmiežavańni tolki suprać «Rasnafty» i «Łukojła» — paśla niaŭdałaj sproby pravieści dvuchbakovuju sustreču z Pucinym u Budapiešcie ŭ kastryčniku minułaha hoda. Paśla hetaha ZŠA pradstavili mirny płan i ŭzhadnili jaho z Ukrainaj i ES. Prezident Ukrainy Uładzimir Zialenski adznačaŭ, što adzinym niavyrašanym pytańniem zastajecca terytaryjalnaje. Prezident Rasii Uładzimir Pucin patrabuje vyvieści vojski Ukrainy ź nieakupavanaj častki Danbasa i pieradać rehijon pad kantrol Maskvy, što dla Kijeva nieprymalna.
23—24 studzienia ŭ Abu-Dabi prajšoŭ pieršy raŭnd trochbakovych pieramoŭ Rasii, ZŠA i Ukrainy, druhi raŭnd zapłanavany na 4—5 lutaha ŭ zakrytym farmacie. U Kramli zajavili, što hatovyja da mirnaha ŭrehulavańnia, ale tolki kali Kijeŭ prymie «adpaviednyja rašeńni» adnosna terytoryj. Tramp adznačyŭ, što prasiŭ Pucina nie bić pa ŭkrainskaj enierhietyčnaj infrastruktury pierad pačatkam pieramoŭ, ale Maskva nie rabiła hetaha tolki paru dzion.
Naŭsieda: Ja budu siarod tych, chto najbolš žorstka patrabuje padaŭžeńnia sankcyj ES suprać Biełarusi
ZŠA prapanavali Indyi zamianić rasijskuju naftu na vieniesuelskuju
Jeŭrasajuz abmiarkoŭvaje poŭnuju zabaronu marskich pieravozak rasijskaj nafty
WSJ apisała try scenary raźvićcia padziej va Ukrainie ŭ 2026 hodzie
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary