Z rasijskaha pałonu viarnuŭsia ŭkrainski vajskoviec, jakoha try hady ličyli zahinułym i navat pachavali
Nazar Dalecki doŭhi čas ličyŭsia zahinułym, ale 5 lutaha viarnuŭsia z pałonu ŭ vyniku praviedzienaha abmienu vajennapałonnymi pamiž Ukrainaj i Rasijaj. Pra heta paviedamiŭ kiraŭnik Lvoŭskaj abłasnoj vajskovaj administracyi Maksim Kazicki, piša «Suśpilnie».
Nazar Dalecki rodam ź siała Vialiki Dorašaŭ pad Lvovam. Jašče da pačatku poŭnamaštabnaj vajny jon udzielničaŭ u antyterarystyčnaj apieracyi na Danbasie, a ŭ 2022 hodzie pajšoŭ abaraniać Ukrainu i słužyŭ u 24‑j asobnaj miechanizavanaj bryhadzie imia karala Daniły.
U mai 2022 hoda mužčyna pierastaŭ vychodzić na suviaź. Spačatku Daleckaha ličyli źnikłym bieź viestak, a potym siamji paviedamili pra jaho śmierć 25 vieraśnia 2022 hoda — u dzień naradžeńnia Nazara. U 2023 hodzie nibyta jahonaje cieła navat pachavali ŭ rodnym siale paśla atrymańnia vynikaŭ DNK.
Adnak u lipieni 2025 hoda adzin z vyzvalenych z pałonu vajskoŭcaŭ paviedamiŭ, što nasamreč Nazar žyvy. Padćvierdzili heta jašče dva vajskoŭcy, paśla čaho svajaki pačali źviartacca ŭ kaardynacyjny štab. U kastryčniku taho ž hoda jašče adzin vyzvaleny vajskoviec paćvierdziŭ, što Nazar znachodziŭsia ŭ kałonii. A ciapier narešcie padčas abmienu pałonnymi 5 lutaha jon viarnuŭsia dadomu.
U hety dzień z rasijskaha pałonu ŭ Ukrainu viarnulisia 157 čałaviek — vajskoŭcy i cyvilnyja. Niekatoryja ź ich znachodzilisia ŭ pałonie z 2022 hoda, niekatoryja byli asudžanyja na praciahłyja terminy. Pa słovach ukrainskaha abmudsmiena Dźmitryja Łubinca, vyzvalenyja majuć ciažki psichałahičny stan, niekatoryja vielmi chudyja, ale ŭsie ščaślivyja viarnucca damoŭ.
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam24
Kamientary