28 maja na Maskoŭskich mohiłkach Minska budzie adkryty pomnik Alaksandru Patupie

28 maja ŭ 16.00 na Uschodnich (Maskoŭskich) mohiłkach Minska adbudziecca cyrymonija adkryćcia pomnika viadomamu piśmieńniku i hramadskamu dziejaču Alaksandru Patupie.

25 maja ŭ 15.00 pa kanale «Kultura» Biełaruskaha radyjo budzie tranślavacca pieradača, pryśviečanaja tvorčaści Alaksandra Patupy. Jaho vieršy prahučać u vykanańni viadomaha dyktara i akciora Aleha Viniarskaha.

Alaksandr Patupa raptoŭna pamior va ŭzroście 64 hadoŭ 1 červienia 2009 hoda, u Mižnarodny dzień abarony dziaciej.

Da hetaj daty minskaje vydaviectva «Knižny Dom» płanuje vypuścić knihu «Rastieriaški» ź vieršami dla dziaciej, napisanymi Alaksandram Siarhiejevičam.

A ŭ sakaviku nakładam 1.030 asobnikaŭ u Minsku byŭ vydadzieny zbornik paezii, prozy i publicystyki Alaksandra Patupy «Rypučaje koła fartuny». Mnohija ŭklučanyja ŭ jaho tvory apublikavany ŭpieršyniu. Naprykład — praniźlivaja liryka, jakaja stała adkryćciom navat dla tych, chto viedaŭ Alaksandra Patupu jak bliskučaha publicysta i piśmieńnika-fantasta.

***

Alaksandr Patupa naradziŭsia 21 sakavika 1945 hoda ŭ Sievastopali. U Biełarusi žyŭ z 1961 hoda.

U 1967 hodzie skončyŭ fizičny fakultet MDU imia Łamanosava (kafiedra kvantavaj teoryi). Kandydat fizika-matematyčnych navuk, aŭtar kala 50 navukovych publikacyj. Zajmaŭsia daśledčaj pracaj u Instytucie fiziki Akademii navuk BSSR, Biełdziaržuniviersitecie.

U 1979 hodzie pa niepraŭdzivym danosie paŭhoda pravioŭ u sumna viadomaj «Vaładarcy». Dziakujučy namahańniam rodnych i siabroŭ byŭ vyzvaleny rašeńniem Viarchoŭnaha suda BSSR.

Nastupnyja dzieviać hadoŭ talenavity vučony, jaki staŭ u 25 hadoŭ kandydatam fizika-matematyčnych navuk u halinie tearetyčnaj fiziki, nie moh uładkavacca na pracu, pierabivajučysia vypadkovymi zarobkami.

Z prychodam pierabudovy Alaksandr Patupa aktyŭna zaniaŭsia vydavieckim biźniesam. Jon arhanizavaŭ i ŭznačaliŭ vydaviecka-palihrafičnuju kampaniju «Erydan» — najstarejšaje pryvatnaje vydaviectva Biełarusi.

U 2001—2007 hadach uznačalvaŭ HA «Biełaruski sajuz pradprymalnikaŭ», z 2008 hoda byŭ hanarovym staršynioj hetaj arhanizacyi.

Uvachodziŭ u skład Hramadska-kansultatyŭnaha savieta pry Administracyi prezidenta Biełarusi, stvoranaha ŭ pačatku 2009 hoda z metaj abmierkavańnia aktualnych pytańniaŭ raźvićcia dziaržavy i hramadstva.

Alaksandr Patupa — doktar fiłasofii, prafiesar, pravadziejny člen Mižnarodnaj akademii infarmacyjnych pracesaŭ i technałohij, Mižnarodnaj akademii lideraŭ biźniesu i administracyi, Ńju-Jorkskaj akademii navuk, Mižnarodnaha instytuta sacyjałohii, Amierykanskaj asacyjacyi sadziejańnia raźvićciu navuki, Nacyjanalnaha hieahrafičnaha tavarystva ZŠA.

Aŭtar navukovych, navukova-papularnych i navukova-mastackich tvoraŭ, mnostva artykułaŭ, apublikavanych u pieryjadyčnym druku, člen Mižnarodnaha PEN-kłuba i Biełaruskaj asacyjacyi žurnalistaŭ.

• 0
• 0
• 0
• 0
• 0
• 0
• 0
• 0