U Śvisłačy znajšli cieła mužčyny. Im akazaŭsia źnikły ŭ kancy śniežnia Pavieł Kałašnikaŭ
Cieła padčas pošukavaj apieracyi kala 11 hadzin siońnia, 3 sakavika, znajšli vałanciory atrada «Anioł». U atradzie paćvierdzili, što heta Pavieł Kałašnikaŭ, piša Onliner.by.
Cieła lažała kala bieraha na pavierchni vady. Niepadalok — kaviarni, bary i muziej skiejtbordynhu, raźmieščanyja ŭ zavodskich pamiaškańniach.
— My padzialilisia na try hrupy. Adna abśledavała dno raki z dapamohaj śpiecyjalnaha abstalavańnia, dźvie inšyja vyvučali bierahavuju častku Śvisłačy. U niejki momant adzin z vałancioraŭ zaŭvažyŭ niešta padobnaje da čornaha pakieta. Jon padciahnuŭ jaho doŭhaj pałkaj, i akazałasia, što heta kurtka, a zatym stała zrazumieła, što pierad nami cieła čałavieka, — raspavioŭ Onliner adzin ź vidavočcaŭ.
Pavieł Kałašnikaŭ źnik u noč z 26 na 27 śniežnia. Chłopiec adpačyvaŭ u načnym kłubie Modul Art Platform, paśla piataj hadziny ranicy vyjšaŭ na vulicu i źnik.
— Dziakujučy kamieram videanazirańnia, ustalavanym na susiednich ustanovach (za pradastaŭlenyja zapisy asobny dziakuj), udałosia vyśvietlić, što Pavieł u pieryjad z 05:30 da 05:40 ranicy vyjšaŭ z kłuba i nakiravaŭsia ŭ bok internataŭ BDU, zatym padyšoŭ da stajanki. Kala 06:00 jon raźviarnuŭsia i pajšoŭ nazad da kłuba. Na hetym jaho ślady hublajucca, — raspaviadaŭ kiraŭnik pošukava-vyratavalnaha atrada «Siryus» Pavieł Jachimovič.
Pošuki Paŭła ŭskładnialisia z-za niaprostych umoŭ nadvorja. Na praciahu studzienia i lutaha terytoryju pračesvali vałanciory, supracoŭniki MNS i ASVODa niekalki razoŭ uskryvali lod, ale znajści źnikłaha tady nie ŭdałosia. Z adlihaj pošuki byli adnoŭlenyja.
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ14
Kamientary