Šaŭroŭ pryjšoŭ na Dzień Voli pratestavać suprać Cichanoŭskaj. A ŭ vyniku zapłaciŭ $1100 štrafu — i Cichanoŭskaja tut ni pry čym
Były palitviazień, jaki niekali prasłaviŭsia zmahańniem z pomnikam Puškinu, znajšoŭ sabie pryhody ŭ Varšavie.
Skandalna viadomy aktyvist Pilip Šaŭroŭ byŭ vymušany zapłacić polskaj dziaržavie štraf pamieram 4000 złotych (kala $1100). Za što mienavita — jon sam nie da kanca razumieje.
28 sakavika 2026 hoda Šaŭroŭ pryjšoŭ na płošču Troch Kryžoŭ u Varšavie, dzie adznačaŭsia Dzień Voli, z płakatami, skiravanymi suprać Śviatłany Cichanoŭskaj. «Cichanoŭskaja — heta Rasieja, Cichanoŭskaja — heta vajna», — napisaŭ jon na kardoncy i kłapatliva abkleiŭ jaje skotčam.
Na płoščy Šaŭroŭ nie parazumieŭsia z arhanizatarami akcyi. U vyniku trapiŭ u palicyju. Ale nastupnyja prablemy byli źviazanyja nie z płakatam. Vyśvietliłasia, što Šaŭroŭ znachodzicca ŭ vyšuku pa niejkaj staroj spravie.
Aktyvist zdahadvajecca, što heta nastupstvy bojki z emihrantam Alaksandram Małaščukom u 2021 hodzie. Šaŭroŭ tłumačyć, što niadaŭna źmianiŭ adras pražyvańnia, tamu, maŭlaŭ, sudovyja papiery mahli nie dajści da jaho.
Kab vyzvalicca, Šaŭrovu daviałosia zapłacić tyja samyja 4000 złotych.
Šaŭroŭ atrymaŭ viadomaść u pačatku 2020 hoda. Aktyvista aryštavali za toje, što jon rasfarbavaŭ u čyrvony koler ruki pomniku Puškinu ŭ Minsku. Kryminalnuju spravu zaviali pa artykule za chulihanstva. Pravaabaroncy doŭha vahalisia, ci abviaščać Šaŭrova palitviaźniem, ale ŭ vyniku dali jamu hety status. Zrešty, nieŭzabavie aktyvista adpuścili ź SIZA. Na sudzie Šaŭrovu prysudzili štraf.
Paśla pratestaŭ-2020 aktyvist źjechaŭ ź Biełarusi, pracuje ŭ Polščy na budoŭli.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?
Kamientary
Dziakuj za pracu!