Infarmacyju pra pošuki 49‑hadovaha Dźmitryja Tarasikava apublikavali ŭ sacsietkach pošukava-vyratavalnaha atrada «Anioł». U aryjenciroŭcy skazana, što mužčyna pajšoŭ z domu ranicaj 30 sakavika. Z taho momantu minčuk nie vychodzić na suviaź, jaho miescaznachodžańnie nie ŭstanoŭlena, piša «Anłajnier».
U lutym 2022 hoda muž i žonka Dźmitryj i Alina Tarasikavy dali «Anłajnieru» vialikaje intervju. Tady hieroi raskazali pra paśpiachovy siamiejny biznes — vytvorčaść aleju. Ciapier z Alinaj taksama źviazalisia, kab daviedacca padrabiaznaści pošukaŭ Dźmitryja.
Jak akazałasia, apošnija 1,5 hoda para znachodzicca ŭ razvodzie, ale padtrymlivaje suviaź z-za dziaciej i ahulnaha biznesu. U milicyju, pavodle słoŭ dziaŭčyny, z zajavaj ab źniknieńni Dzimy źviarnułasia jaho maci.
«Jon sapraŭdy pajšoŭ z domu 30 sakavika. Zdajecca, u vyšuk abviaścili 2 krasavika, kali zrazumieli, što jaho zusim nie mohuć znajści. Siabroŭ i znajomych užo apytali, my z usimi na suviazi — nichto nie viedaje, dzie jon. Pa kamierach vidać, što apošni raz Dzima zachodziŭ u «Karonu» na Karžanieŭskaha, pajeŭ tam — i ŭsio, z taho času ničoha nie viadoma».
Pavodle słoŭ Aliny, apošnija dva tydni jana znachodziłasia ŭ Maskvie. Viarnuŭšysia, napisała Dźmitryju — paviedamleńnie jon pračytaŭ, ale nie adkazaŭ. Zaraz telefon mužčyny vyklučany.
«Sa starejšaj dačkoj Dzima vychodziŭ na suviaź u 20‑ch čysłach sakavika. Spačatku pisaŭ mnie, prapanoŭvaŭ paraźmiaŭlać, ale ja skazała, što ŭ Maskvie. Jon pačaŭ pisać dačce, što «była depresucha i chaciełasia pahavaryć». Apošni raz anłajn jon byŭ 1 krasavika. U nas ahulny biznes, dvoje dziaciej, my byli ŭ šlubie 20 hadoŭ — viadoma, ja vielmi za jaho pieražyvaju».
Taksama žurnalisty źviazalisia z kiraŭnikom PVA «Anioł» Siarhiejem Koŭhanam. Pavodle słoŭ surazmoŭcy, pieršym da ich źviarnuŭsia siabar Dźmitryja. Viadoma, što ŭ toj dzień mužčyna pa prośbie maci nakiravaŭsia ŭ kramu, da jaje jon dajšoŭ. Što zdaryłasia dalej — nieviadoma.
«Razhladajucca ŭsie viersii. Pakul navin niama, mužčyna ličycca źnikłym bieź viestak. Supracoŭniki pravaachoŭnych orhanaŭ pravodziać apieratyŭna-vyšukovyja mierapryjemstvy pa ŭstanaŭleńni jaho miescaznachodžańnia. My abzvońvali i ŭziali na kantrol balnicy i ŭstanovy, ale tam jon nie fihuravaŭ. Taksama nami viadziecca infarmacyjnaja praca, buduć adpracoŭvacca ŭsie źviestki, jakija pastupiać».
Usich, chto vałodaje jakimi-niebudź źviestkami pra źnikłaha mužčynu, prosiać paviedamić infarmacyju ŭ PVA «Anioł» (haračaja linija — 7733, +375 33 666 60 33, +375 29 270 77 33) albo pa telefonie 102.
Ciapier čytajuć
Mužčyna ŭ minskim mietro łapaŭ dziaŭčat, z vyhladu padletkaŭ, i pakazvaŭ im pachabnyja žesty. Jaho zatrymali14
Kamientary