Biełarus u Varšavie niekalki dzion pilnavaŭ złodzieja, jaki skraŭ jaho navušniki. I ŭrešcie viarnuŭ svajo — u kaściole
Z dapamohaj funkcyi prajhravańnia huku jon zdoleŭ vyznačyć patrebny padjezd i navat kvateru ŭ domie — navušniki adhukalisia na jaho sihnał.
Niezvyčajnaja historyja adbyłasia ź biełarusam Uładzimiram u Varšavie: jon niekalki dzion samastojna adsočvaŭ čałavieka, jaki zavałodaŭ jaho biespravadnymi navušnikami, sprabavaŭ damovicca, vyklikaŭ palicyju — i ŭrešcie atrymaŭ reč nazad u davoli niečakanym miescy.
Pra svaju historyju mužčyna raskazaŭ u sacsietkach.
Pavodle jaho słoŭ, havorka pra biespravadnyja navušniki Pixel Buds Pro 2. Kali Uładzimir zrazumieŭ, što jany źnikli, skarystaŭsia funkcyjaj adsočvańnia praz Google — i ŭbačyŭ kankretnuju łakacyju ŭ Varšavie, dzie pryłada aktyvavałasia.
Jon adpraviŭ paviedamleńnie na navušniki z prośbaj źviazacca i abiacańniem uznaharody, ale adkazu nie atrymaŭ. Tady pačaŭ nazirać za pieramiaščeńniem pryłady i ŭ vyniku pajechaŭ da doma, dzie navušniki znachodzilisia.
Na miescy jon niekalki dzion sprabavaŭ vyśvietlić, u jakoj mienavita kvatery znachodzicca jaho reč. Z dapamohaj funkcyi prajhravańnia huku zdoleŭ vyznačyć patrebny padjezd i navat dźviery — navušniki adhuknulisia na jaho sihnał.
Mužčyna sprabavaŭ damovicca z čałaviekam pa toj bok dźviarej, prapanoŭvaŭ hrošy, ale biezvynikova. Paśla vyklikaŭ palicyju, adnak taja ničoha zrabić nie zmahła — dźviery nie adčynili, a padstaŭ dla prymusovych dziejańniaŭ nie było.
Na treci dzień historyja pryniała niečakany pavarot. Praz adsočvańnie biełarus ubačyŭ, što jaho navušniki pieramiaścilisia ŭ centr horada — i kankretna ŭ kaścioł śviatoha Alaksandra.
Uładzimir pajechaŭ tudy i, zajšoŭšy ŭnutr, znoŭ uklučyŭ sihnał. Huk, uzmocnieny akustykaj chrama, pačuŭsia z-za ałtara. Jak vyśvietliłasia, niechta pakinuŭ navušniki kala miesca dla achviaravańniaŭ, paśla čaho słužka adnios ich za ałtar.
U vyniku reč viarnuli ŭładalniku.
Sam hieroj historyi ličyć, što heta byŭ «miks technałohij, nastojlivaści i psichałohii». Na jaho dumku, čałaviek, jaki zabraŭ navušniki, chutčej za ŭsio, nie byŭ prafiesijnym złodziejem, a ŭrešcie adčuŭ vinu i vyrašyŭ viarnuć znachodku — pryčym simvaličnym čynam.
Jon taksama raić zaŭsiody pryviazvać pryłady da akaŭntaŭ i vykarystoŭvać funkcyi adsočvańnia — u hetaj historyi jany adyhrali klučavuju rolu.
Ciapier čytajuć
Mužčyna ŭ minskim mietro łapaŭ dziaŭčat, z vyhladu padletkaŭ, i pakazvaŭ im pachabnyja žesty. Jaho zatrymali1
Kamientary
Ja nie prizyvaju k pravonarušienijam, no etot soviet zabud́tie i vybrośtie iz mozha, eti funkcii mohut syhrať złuju šutku, jeśli vdruh u vas pojaviatsia tierki s zakonom, s supruhami i td, vsiakoje byvajet, a ot sumy i do tiuŕmy,kak hovoritsia...I vas lehko vyčiślat, po smartfonu tožie vyčiślat, poetomu "ieśli vdruh" pojaviliś nieprijatnosti vas izobličajuŝije niemiedlenno izbavlajtieś ot tielefona ,simki i podobnych dievajsov, topitie ,nie žalejtie , svoboda dorožie !