Hubiernatar Prymorskaha kraju RF raskazaŭ, što tam z budaŭnictvam biełaruskaha porta
«Treba troški pieračakać».
Prajekt stvareńnia biełaruskaha porta ŭ rasijskim Prymorji znachodzicca ŭ reziervie da palapšeńnia ekanamičnaj situacyi. Pra heta, adkazvajučy na pytańni žurnalistaŭ, paviedamiŭ hubiernatar Prymorskaha kraju Rasii Aleh Kažamiaka, pieradaje BIEŁTA.
«Pa hetym prajekcie: my jaho trymajem u reziervie. Kali ekanamičnaja situacyja składziecca krychu lepš, my jaho abaviazkova zapuścim, — skazaŭ kiraŭnik rehijona. — Čas sankcyjnaha cisku, treba troški pieračakać».
Aleh Kažamiaka skazaŭ, što prajekt budzie zachoŭvać aktualnaść jašče doŭhi čas, tamu što pastaŭki tavaraŭ z Paŭdniova-Uschodniaj Azii ŭ jeŭrapiejskuju častku Rasii, u Biełaruś «patrebnyja i važnyja, zaŭsiody buduć zapatrabavanyja».
«Port — heta vielmi surjoznaje zbudavańnie, značnaje pa svaich vydatkach. Dumaju, što ŭsio napieradzie. My trymajem u reziervie hety prajekt, pakul biez partnioraŭ ź Biełarusi nie realizujem», — skazaŭ jon.
Padčas papiarednich vizitaŭ kiraŭnika Prymorskaha kraju ŭ Minsk paviedamlałasia pra namier stvareńnia tam sumiesnaha porta jak važnaha punkta na tranzitnym šlachu ŭ Kitaj, jaki ŭjaŭlaje asablivuju cikavaść u śviatle raźvićcia Paŭnočnaha marskoha šlachu.
Paśla straty zvykłych bałtyjskich maršrutaŭ Minsk aktyŭna šukaŭ novyja łahistyčnyja kanały ŭ Rasii, u tym liku ŭ Leninhradskaj vobłaści, Murmansku i na Dalokim Uschodzie. Ale ideja svajho, biełaruskaha porta, pakul vyhladaje bieznadziejna.
Kamientary
"Hubiernatar Prymorskaha kraju RF raskazaŭ, što tam z budaŭnictvam biełaruskaha porta"