Rasiju nakryła charčovaja panika — u bujnych haradach z pryłaŭkaŭ kramaŭ źnikła hrečka. Pierad hetym jana padaražała ŭ niekalki razoŭ. Maskvičy i piciercy pryhadali časy deficytu dy stajańnia ŭ čerhach. Aficyjnyja asoby adrapartavali, što tak zvany «deficyt hrečki» spravakavali ŚMI, jakija śpiekulujuć na temie sušy i nieŭradžaju. Dastałasia i drobnaaptovym pradaŭcam, jakija abiacajuć rost cenaŭ i sa źjaŭleńniem uradžaju hrečki hetaha hodu. Pradstaŭniki Rasijskaha ziernievaha sajuza supakoili, što ŭradžaj hrečki sioleta budzie dastatkovym dla zadavalnieńnia patrebaŭ unutranaha rynku.
Ministerstva ekanamičnaha raźvićcia RF zajaviła: deficyt i padaražańnie hrečki — časovaja źjava, źviazanaja sa skaračeńniem letašnich zapasaŭ i čakańniem novaha ŭradžaju.
Recha «hreckaj paniki» dakaciłasia i da Biełarusi. Što praŭda, zakranuła jano pakul tolki stalicu: apytańnie čytačoŭ «NN» z roznych kutkoŭ Biełarusi pakazała, što pra «hrečnievuju paniku» ŭ lepšym vypadku čuli pa televizary.
Pachod pa kramach u Minsku daŭ nastupnuju karcinu. U nievialikich kramkach hrečki abo niama, abo zastałosia niašmat. Ceny vahajucca ad 2500 rubloŭ da 3800, a to i bolš. «Biarycie, pakul nie padaražała!» — śmiajucca pradaŭcy.
Pavievy paniki adčuvajucca na Kamaroŭskim rynku. Amal va ŭsich pradaŭcoŭ hrečka rasijskaha pachodžańnia z vyjavaj hienieralisimusa Suvorava kaštuje ad 4100 rubloŭ. «Padaražała ŭsia — i našaja, i rasijskaja», — kaža pradavačka. Jaje susiedka dadaje: «I budzie jašče cana raści. Na nastupnym tydni mianiajem ceńniki. Daraście da 6 tysiač, a mo i bolej».Adnak kupcoŭ heta mała chvaluje. «A choć da 10 tysiač! Ja jaje mała kuplaju», — adreahavała na pieraściarohi prdaŭcoŭ žančyna. Pry žadańni, na Kamaroŭcy amataru hrečki možna jašče znajści tannyja krupy. Naprykład, biełaruskuju hrečku pa 1650 rubloŭ za 750-hramovy pakunak.
Dyrektar AAT «Homielski kambinat chlebapraduktaŭ» Michaił Biełašycki paraiŭ nie śpiašacca z vysnovami nakont mahčymaha ažyjatažu vakoł hrečki ŭ Biełarusi. «Uradžaj jašče nie sabrali, tamu havaryć pra niešta možna budzie praz tydzień», — kaža spadar Biełašycki (pa stanie na 28 žniŭnia było ŭbrana kala 23% płoščaŭ — «NN»). Jon adznačyŭ taksama, što zakupnyja ceny na hrečku zastalisia raniejšymi, a prahnozy na ŭradžaj hrečki ŭ Biełarusi sioleta niebłahija.
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary