Minsk admoviŭsia ad zachavańnia naftavaha bałansu

Biełaruskija NPZ pieraviedzienyja na tak zvany aptymalny režym pracy. Jon praduhledžvaje, što abjom pierapracoŭki nafty ŭ hetym hodzie istotna skarocicca. Adpaviedna, skarocicca i impart vuhlevadarodnaj syraviny. Chacia pieršapačatkova na palityčnym uzroŭni stavilisia inšyja zadačy. Adnak biełaruskija ŭłady vyrašyli ŭ dadzienym vypadku pastavić ekanomiku vyšej za palityku.

U 2009 Rasija pastaviła ŭ Biełaruś 21,5 młn tonaŭ nafty na 7,06 młrd dalaraŭ. Paliŭna-enierhietyčny bałans sajuznaj dziaržavy na 2010, jaki byŭ zaćvierdžany ŭ sakaviku hetaha hoda prem'jer-ministrami Biełarusi i Rasii, praduhledžvaje, što abjom impartu rasijskaj nafty ŭ Biełaruś zachavajecca na ŭzroŭni minułaha hoda. Heta značyć, składzie 21,5 młn tonaŭ.

Adnak biełaruski ŭrad, praličyŭšy ekanomiku pastavak rasijskaj nafty, vyrašyŭ inakš. Kancern «Biełnaftachim» paviedamlaje, što naftapierapracoŭčyja zavody pieraviedzienyja na aptymalny režym pracy, jaki praduhledžvaje źmianšeńnie abjomu pierapracoŭki nafty.

Kali ŭ minułym hodzie biełaruskija NPZ štomiesiac pierapracoŭvali amal 2 młn ton nafty (z ulikam syraviny, zdabytaj u Biełarusi), to na ŭvieś 2010 aryjencir dla navapołackaha «Naftana» — 7,8 młn. ton, dla «Mazyrskaha NPZ» — 8 młn ton. U kancernie «Biełnaftachim» tłumačać źmianšeńnie abjomaŭ pierapracoŭki «źmienienymi ŭmovami pastavak nafty z Rasii».

U 2009 štomiesiačnyja pastaŭki rasijskaj nafty ŭ Biełaruś składali ŭ siarednim 1,8 młn ton. U hetym hodzie jany istotna źnizilisia. Za studzień-žnivień 2010 Biełaruś impartavała 8,36 młn ton nafty, u tym liku ŭ žniŭni abjom pastavak skłaŭ krychu bolš za 900 tys. ton. Źnižeńnie abjomu impartu rasijskaj nafty tłumačycca toj akaličnaściu, što praca z mytnaj rasijskaj naftaj nierentabielnaja dla biełaruskich NPZ, tamu pierapracoŭvajuć jany jaje, tolki źmiešvajučy ź biazmytnaj. Rasija pastavić Biełarusi ŭ 2010 6,3 młn ton biazmytnaj nafty, usiu naftu zvyš hetaha abjomu — z poŭnaj vypłataj mytaŭ. Pamier mytaŭ składaje ciapier 273,5 dalara za tonu.

Rasijskaja nafta dla Minska siońnia zanadta darahaja. Nastolki darahaja, što biełaruskija naftapierapracoŭščyki, pa dadzienych «Biełaruskich navinaŭ», addajuć pieravahu dla zahruzki svaich mahutnaściaŭ impartavańniu alternatyŭnaj naftavaj syraviny (vakuumny hazojl, piačnoje paliva), a nie zakuplańniu rasijskaj nafty z mytami.

Alaksandr Łukašenka, naviedvajučy na minułym tydni Mazyrski NPZ, zajaviŭ, što dziakujučy namahańniam naftapierapracoŭščykaŭ biełaruskim NPZ ŭdałosia vystajać, niahledziačy na rasijskija myty na naftu. «My vykaraskajemsia z toj situacyi, u jakuju nas pastaviła Rasija ŭ pačatku hetaha hoda», — padkreśliŭ kiraŭnik Biełarusi.

Kab vykaraskacca, biełaruskim NPZ daviałosia rabić «miks» z mytnaj i biazmytnaj rasijskaj nafty, zakuplać zamiest rasijskaj vieniesuelskuju naftu. Narešcie, jak adznačana vyšej, zahružać mahutnaści za košt alternatyŭnaj naftavaj syraviny.

«Nijakaha kałapsu ŭ naftapierapracoŭcy sapraŭdy nie adbyłosia, — zhadžajecca ekanamist Siarhiej Čały z vysnovami biełaruskich uładaŭ. — U pieršym paŭhodździ abjom pierapracoŭki nafty źniziŭsia na 50%, ale pry hetym ekspart naftapraduktaŭ — tolki na 25%. Tak što da niepapraŭnaj škody, na jakuju, imavierna, byli skiravanyja namahańni Maskvy, dziejańnie naftavych mytaŭ nie pryviało».

U najbližejšy čas biełaruskija ŭłady pastarajucca maksimalna źmienšyć zaležnaść ad rasijskaj nafty. Pa vynikach hetaha hoda aficyjny Minsk płanuje atrymać 4 młn ton vieniesuelskaj nafty, u 2011 — 8–9 młn ton, a ŭ 2012 z łacinaamierykanskaj krainy pavinna pastupić u Biełaruś 10 młn ton nafty.

«Šmat u čym ažyćciaŭlalnaść płanaŭ biełaruskaha boku pa pavieličeńni pastavak vieniesuelskaj nafty budzie zaležać ad pazicyi Ukrainy i krain Prybałtyki, praź jakija nafta ź Vieniesueły budzie pastupać da nas «, — kaža Siarhiej Čały.

Na dumku surazmoŭcy «Biełaruskich navinaŭ», zadačy pa pavieličeńni pastavak vieniesuelskaj nafty dasiahalnyja.

«Naša zadača — uzmacnić intryhu i stvaryć kankurencyju pamiž krainami, jakija zachočuć udzielničać u tranzicie vieniesuelskaj nafty», — miarkuje surazmoŭca «Biełaruskich navinaŭ».

Nie pakidajuć biełaruskija ŭłady i nadziej na pierahlad umovaŭ pastavak u krainu rasijskaj nafty. Na apošnich pieramovach z kiraŭnictvam Rasii, jakija prachodzili ŭ Maskvie ŭ červieni, Alaksandr Łukašenka ŭzdymaŭ pytańnie ŭmovaŭ pastavak u krainu nafty.

«Dla taho kab uščylnuju padyści da poŭnafarmatnaha stvareńnia Mytnaha sajuza», Łukašenka prapanavaŭ Kramlu z 1 studzienia 2011 skasavać myty na naftu, jakaja pastaŭlajecca ŭ Biełaruś. Adnak pakul hetaja prapanova zastajecca biez adkazu.

Staršy ekśpiert rasijskaha Instytuta enierhietyki i finansaŭ Siarhiej Ahibałaŭ miarkuje, što

Biełaruś stanoŭčaha adkazu ad Maskvy tak i nie dačakajecca, i myty na naftu buduć dziejničać i ŭ nastupnym hodzie.

«Siońnia niama padstavaŭ mierkavać, što ŭmovy mohuć być pierahledžanyja. Rasija pastaŭlaje ŭ Biełaruś častku nafty biez spahnańnia mytaŭ i ličyć navat siońniašnija ŭmovy ilhotnymi dla Biełarusi», — kaža ekśpiert.

Hetyja ŭmovy, jak bačym, prymusili Biełaruś upieršyniu za mnohija hady adyści ad zachavańnia paliŭna-enierhietyčnaha bałansu sajuznaj dziaržavy. Upieršyniu ŭ hetym hodzie Biełaruś nie vybiera ŭ Rasii abjom nafty, zafiksavany ŭ enierhietyčnym bałansie sajuznaj dziaržavy. I hety fakt navodzić na dumku, što

damoŭlenaści ŭ ramkach sajuznaj dziaržavy siońnia mała čaho vartyja.

• 0
• 0
• 0
• 0
• 0
• 0
• 0
• 0