Sojm PBNF prapanavaŭ vyjści z kiraŭničych orhanaŭ usim, chto nie za Kastusiova
Sojm Partyi BNF rekamiendavaŭ vyjści sa svajho składu tym členam partyi, chto nie źbiraŭ podpisy za partyjnaha kandydata ŭ prezidenty Ryhora Kastusiova i ŭvajšoŭ u inicyjatyŭnyja hrupy inšych kandydataŭ. Adpaviednaja pastanova była pryniata na pasiadžeńni sojma 20 listapada.
Takim členam partyi taksama prapanavana skłaści ź siabie paŭnamoctvy kiraŭnikoŭ u terytaryjalnych partyjnych arhanizacyjach.
Pavodle źviestak BiełaPAN, u pieršapačatkovym prajekcie pastanovy ŭtrymlivaŭsia pieralik proźviščaŭ, jakim rekamiendavana vyjści sa składu sojma. U śpisie značylisia Viktar Ivaškievič, Juryj Chadyka, Alaksiej Maračkin, Jarasłaŭ Biernikovič, Siarhiej Mudračenka,adnak u pryniataj pastanovie bolšaść členaŭ sojma vyrašyli admovicca ad kankretyzacyi.
Sojm Partyi BNF taksama pryniaŭ rašeńnie viarnucca da razhladu pytańnia ab členach partyi, jakija nie ŭdzielničali ŭ vybarčaj kampanii partyjnaha kandydata, ale dałučylisia da kampanij inšych udzielnikaŭ pieradvybarnaj honki, na svaim najbližejšym paśla vybaraŭ pasiadžeńni.
Niazhodu z pryniataj pastanovaj vykazaŭ člen sojma Partyi BNF Juryj Chadyka,jaki ŭvachodzić u inicyjatyŭnuju hrupu Andreja Sańnikava. Jon zajaviŭ, što maje prava padtrymlivać taho kandydata, u jakoha jość najbolšyja šancy na pieramohu. Pavodle słoŭ Chadyki, jon navat nie staviŭ svoj podpis u padtrymku vyłučeńnia Kastusiova kandydatam u prezidenty. Palityk ličyć, što Kastusioŭ nabiare nievialiki pracent hałasoŭ vybarščykaŭ, i heta moža niehatyŭna adbicca na imidžy Partyi BNF.
Pryniaćciu pastanovy papiaredničała vystupleńnie Ryhora Kastusiova. Jon zajaviŭ, što ličyć źnievažalnymi dziejańni adnapartyjcaŭ, jakija pracujuć na štaby inšych udzielnikaŭ vybarčaj kampanii.
Kastusioŭ paviedamiŭ, što napiaredadni rehistracyi kandydataŭ u prezidenty jamu prapanavali źniać svaju kandydaturu ŭ padtrymku lidaraŭ kampanij «Havary praŭdu!» Uładzimira Niaklajeva i «Jeŭrapiejskaja Biełaruś» Andreja Sańnikava.
«17 listapada prapanova źniacca z vybaraŭ ad dvuch členaŭ sojma prahučała ŭ formie šantažu — jany zajavili, što Centrvybarkam pryznaje sapraŭdnymi mienš čym 100 tysiač podpisaŭ, a tamu ja nie budu zarehistravany kandydatam u prezidenty», — skazaŭ Kastusioŭ.
Palityk ličyć padobnuju prapanovu «źnievažalnaj dla siabie, dla tych, chto źbiraŭ podpisy ŭ jaho padtrymku, dla Partyi BNF jak palityčnaj arhanizacyi».
Kamientary