Faza aholenych špahaŭ
"Hazprom" prazrysta namiaknuŭ siońnia, što ad 1 studzienia moža adklučyć Biełarusi haz. Piša Alaksandar Kłaskoŭski.
Pradstaŭnik "Hazpromu" Kupryjanaŭ prazrysta namiaknuŭ siońnia, što ad 1 studzienia rasiejski manapalist moža adklučyć Biełarusi haz.
Admietna, što akurat pierad vychodnymi kiraŭniki "Biełtranshazu" i "Hazpromu" praviali pieramovy ŭ Maskvie. Siońniašniaja zajava daje padstavy zrabić vysnovu, što vialikaha plonu dyjaloh u piatnicu nia daŭ.
Hazavy blickryh Maskva adnojčy ŭžo sprabavała. Heta było ŭ lutym 2004 hodu. Ale tady, na dumku šerahu analitykaŭ, psychalahičnuju pieramohu atrymaŭ Miensk. U pryvatnaści tamu, što ŭzrušyłasia Eŭropa, intaresy jakoj taksama paciarpieli.
Voś što ja pisaŭ z hetaj nahody ŭ "Našaj nivie" paŭhodu tamu:
"Tak było ŭ lutym 2004 hoda. Tady Maskva maralna prajhrała pieršuju hazavuju vajnu.
Biełaruski prezydent adklikaŭ ambasadara, nazvaŭ dziejańni rasiejskaha kiraŭnictva dziaržaŭnym teraryzmam, zastupiŭsia za Eŭropu, jakaja biaźvinna paciarpieła ad začynienaj zasłanki. I navat zhodu na "ŭmovy Pucina" padaŭ jak zmušanaje adryvańnie kavałku ŭ čarnobylcaŭ dy veteranaŭ.
Karaciej, zrabiŭ sabie humanistyčny dy patryjatyčny pijar pa poŭnaj prahramie. Napałochaŭ Kreml rachunkam za vajskovyja abjekty dy inšyja pasłuhi. Nabraŭ ačkoŭ jak realny abaronca suverenitetu.
A pastfaktum, kali kanflikt zbolšaha ŭłahodzili, jašče j virtuozna zrabiŭ apazycyju vinavataj. Maŭlaŭ, heta jana raspalvaje varožaść da bratniaje Rasiei, palityzujučy sprečku haspadarčych subjektaŭ.
Pierakazvaju tak detalova, bo siužet moža paŭtarycca".
Siońnia my bačym, što siužet sapraŭdy paŭtarajecca.
Ale da jakoj stadyi mahčymy dubal-2? Ci ryzyknie rasiejski bok znoŭ učynić fors-mažor?
Ekanamist Jarasłaŭ Ramančuk u razmovie sa mnoj padkreśliŭ: symptamatyčna, što novyja hroznyja zajavy Maskvy hučać paśla taho, jak biełaruski prezydent sustreŭsia z Pucinym, a zatym čarhovy raz namiaknuŭ na mahčymaść sustrečnaha rachunku (płata za rasiejski tranzyt, vajskovyja abjekty i h.d.) ŭ vypadku rezkaha padaražeńnia hazu.
"Baki ahalili špahi, i kampramis pakul ŭhledzieć ciažka, — kaža ekspert. — Vidavočna, što Miensk da apošniaha nia choča pradavać "trubu", a Kreml pakazvaje, što zaraz užo nie źbirajecca žartavać".
Jon dadaŭ, što hetym razam Rasieja moža lepiej padrychtavacca da imaviernaha blickryhu. U pryvatnaści, damovicca z Ukrainaj pra pavieličeńnie prapampoŭki "błakitnaha paliva" ŭ Eŭropu.
Zvyš taho, zaznačyŭ moj surazmoŭca, za aficyjny Miensk Zachad moža i nie zastupicca tak, jak niekali za "aranžavuju" Ukrainu, što taksama źviedała "hazavuju vajnu" napačatku 2006 hodu.
Pavodle papiaredniaha prahnozu Ramančuka, "błakitnaje paliva" z novaha hodu moža kaštavać dla Biełarusi blizu 150 dalaraŭ.
Kamientary